Azərbaycan Əmək və Əhalinin Sosial Müdafiəsi Nazirliyinin rəhbərliyi ilə Dünya Bankının İnsan İnkişafı Departamentinin heyəti arasında tanışlıq görüşü keçirilib.

AzVision.az Trend-ə istinadən xəbər verir ki,Nazirliyin İctimaiyyətlə əlaqələr şöbəsindən verilən məlumata görə, görüşdə qonaqları salamlayan əmək və əhalinin sosial müdafiəsi naziri Səlim Müslümov Dünya Bankı ilə Azərbaycan hökuməti arasında əməkdaşlığın daim inkişaf etdiyini bildirərək, bu əməkdaşlığın ölkəmizdə əmək və sosial müdafiə sahəsində islahatların aparılmasında da xüsusi önəm daşıdığını vurğulayıb.

Dünya Bankı ilə birgə icra edilən "Sosial Müdafiənin İnkişafı" layihəsinin icrası sahəsində görülən işlərdən söz açan nazir S.Müslümov layihənin respublikamızda sosial müdafiə sisteminin təkmilləşdirilməsinə mühüm töhfələr verdiyini diqqətə çatdırıb. Eyni zamanda, o, ünvanlı sosial yardım proqramları üzrə şəffaflığın təmin olunmasının əsas elementi sayılan "kontaktsız" xidmət prinsipinin və əlilliyin müəyyən olunmasının müasir metodlarının tətbiqi üçün Dünya Bankının texniki yardımına ehtiyac olduğunu qeyd edib.
Dünya Bankının İnsan İnkişafı Departamentinin sektor direktoru əvəzi, Avropa və Mərkəzi Asiya regionu üzrə sektor meneceri Alberto Rodrigez təmsil etdiyi təşkilatın Azərbaycanla əməkdaşlığın inkişaf etdirilməsində maraqlı olduğunu qeyd edib. A.Rodrigez dinamik sosial-iqtisadi tərəqqinin təmin olunduğu Azərbaycanın sosial müdafiə sistemində aparılan islahatlar prosesinə bundan sonra da dəstək verməyə hazır olduqlarını vurğulayıb.

Görüşdə gələcək əməkdaşlıq məsələləri ətrafında da fikir mübadiləsi aparılıb, sosial xidmətlərin və işçi qüvvəsinin inkişafının prioritet əhəmiyyət kəsb etdiyi nəzərə alınmaqla, qarşıdakı dövrdə bu sahələr üzrə yeni layihənin icrası məsələsi müzakirə edilib.

Qeyd olunub ki, nəzərdə tutulan layihənin əsas məqsədi səmərəli sosial xidmət mexanizminin formalaşdırılması və işçi qüvvəsinin keyfiyyətcə yüksəldilməsi üçün institisional potensialın artırılması, sosial tərəfdaşlığın gücləndirilməsidir. Layihə nəticə etibarilə həssas əhali qruplarının sosial rifah halının yaxşılaşmasına, əmək məhsuldarlığının və iqtisadiyyatın rəqabət qabiliyyətliliyinin artırılmasına xidmət edir.