Qəsəbədaxili yolların təmiri 2023-cü ilədək başa çatacaq

  13 Yanvar 2020    Oxunub : 1601
 Qəsəbədaxili yolların təmiri 2023-cü ilədək başa çatacaq
Abşeron rayonunun Saray, Ceyranbatan, Mehdiabad, Qobu qəsəbələrinin və Masazır kəndinin ərazilərində ümumi uzunluğu 29,2 kilometr olan avtomobil yollarının əsaslı təmirinə yaxın günlərdə başlanılacaq.
Bunu Azvision.az -a açıqlamasında Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli deyib. Onun sözlərinə görə, yağışlı hava şəraiti işlərin başlanılmasını bir qədər ləngidir.

“Hava şəraiti sabitləşən kimi Abşeron rayonu ərazisində qəsəbədaxili yolların təmirinə başlanılacaq. Artıq hazırlıq işlərinə start verilib. Qəsəbədaxili yolların təmirinin 2023-cü ilədək bitməsi planlaşdırılır”.

Qeyd edək ki, Prezident İlham Əliyev yanvarın 9-da “Abşeron rayonunun ərazisində avtomobil yollarının əsaslı təmiri ilə bağlı əlavə tədbirlər haqqında” Sərəncam imzalayıb. Sərəncama əsasən, Abşeron rayonunun Saray, Ceyranbatan, Mehdiabad, Qobu qəsəbələrinin və Masazır kəndinin ərazilərində ümumi uzunluğu 29,2 kilometr olan avtomobil yollarının əsaslı təmiri məqsədilə Azərbaycan Respublikasının 2020-ci il dövlət büdcəsinin dövlət əsaslı vəsait qoyuluşunun (investisiya xərclərinin) bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 19,7 milyon manatı Azərbaycan Avtomobil Yolları Dövlət Agentliyinə ayrılıb.

Aytən Zəhra
Azvision.az

Teqlər: Yol   Təmir