Legionerlərimiz: kim və harada - SİYAHI

Legionerlərimiz: kim və harada - SİYAHI
  27 Yanvar 2014    Oxunub:1588
Azərbaycan futbolçularının ölkə hüdudlarından kənara çıxmasına heç bir əngəl olmasa da, onlar hələ də əcnəbi klublarda istənilən səviyyədə möhkəmlənə bilmirlər. Bəlkə də milli komandamızın müdafiəçisi Ruslan Abışovun Rusiyanın “Rubin” klubunda çıxış etdiyi bir zamanda legionerlər futbolçularımızla bağlı problemlərdən danışmağımız bir qədər qəribə görünə bilər, amma unutmaq olmaz ki, legionerlərimiz həm də dünya futbolu ilə əlaqələndiricilərimizdir. Bu baxımdan futbolçularımızın xariici klublarda duruş gətirə bilməməsi cidi çatışmazlıqdır.

Hazırda legionerlərimizlə bağlı vəziyyət o qədər də ürəkaçan olmasa da, son günlər yerli futbolçulardan bir neçəsinin bir sıra əcnəbi klubların diqqət mərkəzinə düşməsi vəziyyətin dəyişmə ehtimalını artırır. Maraqlı olacağını nəzərə alıb, xarici klubların diqqət mərkəzində olan futbolçularımızı və onlarla maraqlanan xarici komandaları nəzərinizə çatdırırıq.

Cari mövsümdə “Qəbələ”nin uğurları üçün çalışan Amit Quluzadə yenidən qardaş ölkəyə yollana bilər. Məlumat üçün bildirək ki, yarımmüdafiəçi ilə Türkiyənin PTT birinci liqasında mübarizə aparan “Manisaspor” və “Şanlıurfaspor” komandaları maraqlanır. Amma 21 yaşlı futbolçu hələ qərar verməyə tələsmir. Belə ki, əgər Antalya toplanışının sonuna qədər Yuri Syomin Amitin xidmətində maraqlı olmadığı məlum olsa, o zaman Türkiyə variantı reallaşacaq.

Yığma komandamızın və Ağdamın “Qarabağ” klubunun üzvü Qara Qarayev də qış fasiləsindən sonra karyerasını əcnəbi komandada davam etdirə bilər. Belə ki, Qarayevin adı bəzi aşağı bundesliqa klubları ilə anılmaqdadır. Hətta “Lokurlusportmangement” menecerlik şirkətinin nümayəndələri Orhan Lokurlu və Süleyman Mərcanın yarımmüdafiəçinin transferi üçün adı açıqlanmayan bəzi Almaniya klubları ilə danışıqlar apardığı məlumdur.

Qara Qarayev üçün Almaniya klubları ilə danışıqları davam etdirən “Lokurlusportmangement” şirkətinin Qarayevlə yanaşı, Araz Abdullayevin də keçidi üçün danışıqlar apardığı məlum olub. Fərq burasındadır ki, “Neftçi”nin üzvü ilə Almaniyanın yüksək dəstəsində mübarizə aparan kollektivlər maraqlanmaqdadır.

Bakının “Neftçi” komandasının yarımmüdafiəçisi Cavid İmamverdiyev də xarici klubların maraq dairəsindədir. Mövsümün əvvəlində Ukraynanın “Hoverla” komandasına keçidi alınmayan İmamverdiyev hazırda bu klubla yanaşı, Türkiyə “Adanaspor”unun da diqqət mərkəzindədir. Hətta Adana təmsilçisinin məşqçilərinin Cavid İmamverdiyevin oyununu Topaz premyer liqasının 16-cı turundakı “Qarabağ”-“Neftçi” matçında izlədiyi və tərəflər arasında danışıqların son mərhələdə olduğu bildirilir.

Mövsümün geridə qalan hissəsini “Sumqayıt”da keçirən və qış fasiləsində komandadan ayrılan Nurlan Novruzov da əcnəbi kluba keçməsi gözlənilən futbolçularımız sırasındadır. Hazırda “Bakı”ya məxsus olan 21 yaşlılardan ibarət millimizn üzvü ilə maraqlanan komandaya gəlincə, Novruzovun Əlcəzairin “USM Alger” komandasına transferi gündəmdədir. Hazırda İspaniyada hazırlıq keçən sözügedən komandanın futbolçumuzu toplanışdan öncə sıralarına qatması gözlənilsə də, tərəflərin bütün detallarda razılıq əldə etməməsi keçidin rəsmiləşməsini ləngidib.

Deyəsən, bundan sonra ölkə hüdudlarından kənardakı futbolçularımızdan danışarkən “Qəbələ”nin orta xətt oyunçusu Nizami Hacıyevdən də bəhs edəcəyik. Belə ki, hələ transfer dönəminin açılmasına xeyli müddət qalmış adı Polşanın “Poqon” komandası ilə anılan, hətta mövsümün əvvəlində Polşa təmsilçisinin düşərgəsində baxışda da olan Nizami Hacıyevin də ölkə xaricinə çıxmaq şansı yüksək qiymətləndirilir. Düzdür, adıçəkilən kollektiv “Qəbələ”nin istədiyi məbləği ödəmək istəmədiyindən Hacıyevin “Paqon”a transferi real görünümür, amma digər Polşa təmsilçisi “Korona”nın yarımmüdafiəçinin keçidində maraqlı olması anlaşmanın baş tutma ehtimalını artırır.

Almaniya “Kayzersulatern”inin ikinci komandasında top qovan milli komandamızın üzvü Rüfət Dadaşov çıxış etdiyi ölkəni dəyişməsə də, klubunu dəyişə bilər. Belə ki, yayılan informasiyalara görə, Dadaşovla milli komandamızın sabiq məşqçisi Olaf Yansenin çalışdırdığı Drezden “Dinamo”su maraqlanır.

Qış fasiləsində Azərbaycanı tərk etməsi gözlənilən daha bir oyunçu isə “İnter” klubunun və milli komandamızın hücumçusu Vaqif Cavadovdur. Hazırda Topaz premyer liqasının bombardiri olan Cavadovun xidmətində Bolqarıstanın “Montana” kollektivi maraqlıdır. Bolqarıstan mətbuatının iddiasına əsasən, sözügedən komanda hücum xəttindəki problemi həmyerlimizi transfer etməklə həll etmək niyyətindədir.

Milli komandamızın sabiq üzvü milliləşdirilən legioner Murad Hüseynov da əcnəbi klubların maraq dairəsində olan futbolçularımızdandır. Son vaxtlar Serbiya və Çexiya klublarında baxışda olan dağıstanlı forvard hazırda Rusiya aşağı dəstəsində mübarizə aparan “Luç Enerji” komandasının düşərgəsindədir. Hücumçu baxışdan uğurla keçsə, Rusiya klubu ilə müqavilə bağlayacaq.

Tural Məmmədov
AzVision.az üçün



Teqlər:  





Xəbər lenti