“İran Azərbaycanın ədalətli mövqeyini tam dəstəkləyir” - Səfir

 “İran Azərbaycanın ədalətli mövqeyini tam dəstəkləyir” -   Səfir
  23 Oktyabr 2020    Oxunub:3335
İranın Azərbaycandakı səfiri Seyid Abbas Musəvi ölkəsinin Azərbaycanın işğaldan azad olunmuş sərhədyanı ərazilərində quruculuq işlərinin həyata keçirilməsində maraqlı olduğunu bildirib.
İqtisadiyyat Nazirliyindən Azvision.az -a verilən məlumata görə, bu barədə səfir Azərbaycanın İqtisadiyyat naziri Mikayıl Cabbarovla görüşdə bildirib. Səfir Araz çayı üzərində "Xudafərin" və "Qız Qalası" hidroqovşaqları və su elektrik stansiyaları layihələrinin Azərbaycan ilə birgə icrasının ölkələrin iqtisadi əməkdaşlığını daha da dərinləşdirəcəyini diqqətə çatdırıb. Bundan əlavə, görüşdə sənaye, kənd təsərrüfatı, nəqliyyat-logistika, investisiya, kiçik və orta sahibkarlıq, ticarət, turizm və s. sahələrdə əməkdaşlığın inkişafı və qarşılıqlı maraq doğuran digər məsələlər müzakirə olunub.

Öz növbəsində, M. Cabbarov ölkədə diplomatik fəaliyyətə başlaması münasibəti ilə səfiri təbrik edib, uğurlar arzulayıb. Vurğulayıb ki, Azərbaycan və İran prezidentlərinin siyasi iradəsi və dostluq münasibətləri ikitərəfli əməkdaşlığın inkişafında əsas hərəkətverici qüvvədir. Son 7 ildə dövlət başçıları arasında 13 yüksək səviyyəli görüş keçirilib və mühüm qərarlar qəbul edilib.

Bildirilib ki, ölkələrin arasında iqtisadiyyatın müxtəlif sahələrində tərəfdaşlıq inkişaf edir, Azərbaycanın əlverişli biznes mühitindən yararlanan İran şirkətlərinin sayı artır, qarşılıqlı investisiya əməkdaşlığı həyata keçirilir, birgə layihələr icra olunur.

Nazir Ermənistanın Azərbaycana qarşı təcavüzkar siyasəti və son təxribatları, günahsız mülki əhaliyə və mülki obyektlərə raket zərbələri endirərək törətdiyi terror və müharibə cinayətləri, Azərbaycanın beynəlxalq hüquq çərçivəsində vətəndaşlarının təhlükəsizliyinin təmin edilməsi və torpaqlarımızın işğaldan azad olunması üçün öz ərazisində apardığı əks-hücum əməliyyatı barədə məlumat verib, İranın münaqişənin Azərbaycanın ərazi bütövlüyünün bərpası və suverenliyinə hörmət çərçivəsində həllinə dəstək verdiyini vurğulayıb. Səfir Seyid Abbas Musəvi İranın Ermənistan-Azərbaycan münaqişəsində Azərbaycanın ədalətli mövqeyini və ərazi bütövlüyünü tam dəstəklədiyini, hər cür separatizmi pislədiyini vurğulayıb.



Azvision.az


Teqlər: İran   Azərbaycan  





Xəbər lenti