Qərəzli qətnaməyə səs verməyən fransız senator kimdir?
O, 2013-cü ilin oktyabrında prezident seçkiləri zamanı müşahidəçi qismində Azərbaycana səfər edib. Həmin il fransalı senatorlar Kristian Nemi və Mohamed Salehi ilə Quba Soyqırımı Memorial Kompleksini ziyarət ediblər.
Silvi Qo-Şaven 23 may 1963-cü ildə Fransanın O-de-Frans regionunda yerləşən Dünkerk şəhərində anadan olub. 57 yaşlı Fransız siyasətçi, Senatın üzvü olmaqla yanaşı “Radikal Partiya”nın nümayəndəsi və Kerdon şəhərinin meridir.
2012-ci ildə Qua Şaven parlament nümayəndə heyətinin tərkibində Azərbaycan Prezidenti İlham Əliyev tərəfindən qəbul edilib. Prezident İlham Əliyev xanım siyasətçiyə Fransa Senatında “Qanunla tanınmış soyqırımların mövcudluğunun təkzib edilməsi üçün cəza nəzərdə tutan qanun”un müzakirələri zamanı sərgilədiyi ədalətli mövqeyə görə təşəkkür edib.
2016-cı ilin aprel ayında Silvi Qo-Şaven erməni təxribatları ilə bağlı bəyanat yayaraq, Ermənistanın Azərbaycanın mülki əhalisinə və ərazilərinə qarşı təcavüzünü ən sərt şəkildə qınayıb və Ermənistan silahlı qüvvələrinin Dağlıq Qarabağ və ətrafındakı yeddi rayonu qanunsuz olaraq işğal etdiyini xatırladıb.
O zaman, xanım siyasətçi Ermənistanı təxribatlarını dayandırmağa və beynəlxalq hüquqa hörmət etməyə, silahlı qüvvələrinin geri çəkilməsinə dair BMT Təhlükəsizlik Şurasının qətnamələrini yerinə yetirməyə çağırıb: “Azərbaycanın mülki əhalisini, nə qadınları, nə də uşaqları ayırd etmədən qətlə yetirən erməni qoşunlarının işğal etdiyi Dağlıq Qarabağ və ətrafındakı rayonlar sabitlik adası, Fransanın iqtisadi tərəfdaşı və terrorla mübarizədə əvəzolunmaz müttəfiq olan Azərbaycan Respublikasına məxsusdur”.
Azvision.az