Bunu Azvision.az -a Milli Məclisin Gəncədən seçilən deputatı Naqif Həmzəyev bildirib. Millət vəkili qeyd edib ki, 44 gün davam edən müharibədə cəmiyyətimizin nümayiş etdirdiyi möhtəşəm səfərbərlik xalqımızın dövlət başçısının ətrafinda sıx birləşməsinin bariz ifadəsi olmaqla yanaşı, eyni zamanda yeni və qüdrətli Azərbaycanın bütün dünyada özünütəsdiqi kimi qəbul edildi.

"Tarixin bütün mərhələsində sərhəd tanımayan erməni vandallığı 44 günlük Vətən müharibəsi zamanı dünya ictimaiyyətinin gözü qarşısında baş verdi. Faşist ideologiyalı erməni tör-töküntüləri münaqişə zonasından kilometrlərlə uzaqda yerləşən Gəncə şəhərini dəfələrlə qadağan olunmuş silahlarla atəşə tutdu, dinc sakinlərin, körpələrin ölümünə səbəb oldular, evləri yerlə yeksan etdilər.

2020-ci ilin yekunlarına həsr olunmuş müşavirədə çıxışı zamanı ölkə Prezidenti İlham Əliyev Gəncə şəhərində yaşayış binalarının Ermənistan tərəfindən ballistik raketlərlə dağıdılması və bunun nəticəsində bir çox insanın həlak olması faktının erməni vəhşiliyini bir daha bütün dünyaya göstərdiyinə diqqət çəkərək bildirib ki, bu evlər yenidən tikilməlidir, amma həmin yerlərdə yox, həmin yerlər xatirə komplekslərinə çevrilməlidir".



N.Həmzəyev bildirib ki, artıq Prezident İlham Əliyevin rəhbərliyi ilə işğaldan azad edilmiş şəhərlərimizdə, yurd yerlərimizdə tikinti-quruculuq, abadlıq işləri aparılır. Tezliklə bu ərazilər gülüstana çevriləcək. Lakin erməni vandallığı, barbarlığı heç vaxt unudulmayacaq, yaddan çıxmayacaq.

"Ölkə başçısının göstərişi ilə Gəncə şəhərində dağılmış çoxmənzilli evlərin ərazilərində təmizlik işlərinə start verilib, layihələr hazırlanır. Erməni vandallarının təcavüzkar siyasətinin qurbanı olan şəhidlərimizin əziz xatirəsini əbədiləşdirən xatirə kompleksi həmin ərazilərdə yaradılacaq. Ölkə Prezidentimizin də qeyd etdiyi kimi xaricdən gələn qonaqlar görsünlər ki, biz hansı vəhşilərə qarşı müharibə aparmışıq, öz torpağımızı və Cənubi Qafqazı hansı bəladan xilas etmişik".

Aytən Zəhra
Azvision.az