Binədə altı evdən oğurluq edən şəxs tutuldu

Binədə altı evdən oğurluq edən şəxs tutuldu
  05 May 2021    Oxunub:2555
Binə qəsəbəsində müxtəlif vaxtlarda altı evdən oğurluq edən şəxs - əvvəllər məhkum olunmuş paytaxt sakini Taleh Muxtarov Xəzər Rayon Polis İdarəsinin 3-cü polis bölməsi əməkdaşlarının həyata keçirdikləri əməliyyat nəticəsində saxlanılıb.
Daxili İşlər Nazirliyinin mətbuat xidmətindən Azvision.az -a bildiriblər ki, araşdırma zamanı onun Xəzər rayonunun Binə və digər qəsəbələrində altı evdən pul, qızıl-zinət, məişət əşyaları, habelə velosipedlər oğurladığı məlum olub. Onun zərərçəkənlərə ümumilikdə 40 min manata yaxın maddi ziyan vurduğu müəyyənləşdirilib. Taleh Muxtarov izahatında paytaxtın Suraxanı və Sabunçu rayonlarında da evlərdən oğurluq etdiyini bildirib.

Onun əldə etdiyi qızıl-zinət əşyalarını metronun “Neftçilər” stansiyasının yaxınlığındakı qızıl qəbulu mağazalarına satdığı məlum olub.

Faktlarla bağlı 3-cü polis bölməsində toplanan materiallar Xəzər Rayon Polis İdarəsinin istintaq şöbəsinə göndərilib. Taleh Muxtarov barəsində Cinayət Məcəlləsinin müvafiq maddəsi ilə cinayət işi başlanıb, zəruri istintaq və əməliyyat-axtarış tədbirləri davam etdirilir.

Onun paytaxt ərazisində digər analoji cinayətlər etdiyi istisna olunmur. Həmin şəxsin qanunsuz əməllərindən zərərçəkən başqa vətəndaşlar olarsa, bu barədə ərazi polis orqanlarına və Daxili İşlər Nazirliyinin 102 Xidməti - Zəng Mərkəzinə məlumat verə bilərlər.

Azvision.az


Teqlər: DİN   Binə  





Xəbər lenti