“Azərbaycan unikal tərəfdaşlıq platformaları yaradıb” - Deputat

“Azərbaycan unikal tərəfdaşlıq platformaları yaradıb” -  Deputat
  26 May 2021    Oxunub:1676
“Azərbaycanın beynəlxalq münasibətlər sistemində yeri və rolu ardıcıl olaraq artmaqdadır. Bu da səbəbsiz deyil. Çünki Azərbaycan Prezidenti Cənubi Qafqaz kimi mürəkkəb və çətin bir regionda ümumi maraqlara xidmət edən unikal tərəfdaşlıq platformaları yarada bilib. Bu isə ölkəmizin strateji məsələlərdə rolunu daha da artırır”.
Bunu Azvision.az –a açıqlamasında Milli Məclisin deputatı Hikmət Babaoğlu deyib. Deputatın sözlərinə görə, diqqət etsək görərik ki, artıq uzun illərdir həyata keçirilən enerji layihələri Qərbin enerji təhlükəsizliyi üçün mühüm strateji alternativə çevirilib. Buna paralel olaraq yeni nəqliyyat kommunikasiyalarını yaradıb, “Böyük İpək” yolunun orta dəhlizi üçün Bakı-Tbilisi-Qars dəmiryolunun timsalında əlverişli və təhlükəsiz nəqliyyat rabitəsini təmin edib:

“Cənub Qaz Dəhlizi ayrıca bir tarixi hadisə olmaqla 21-ci əsrin müqaviləsi hesab edilir. Bütün bunlar yalnız enerji sahəsində Azərbaycanın yaratdığı strateji reallıqlardır. Bundan başqa ölkəmiz bir sıra beynəlxalq təşkilatlarda təmsil olunmaq və onlara rəhbərlik etmək təcrübəsində də yeni reallıqlar yaratmağı, təşəbbüskar olmağı bacarıb. Azərbaycan BMT Təhlükəsizlik Şurasının qeyri-daimi üzvü kimi bu təşkilata rəhbərlik edərkən beynəlxalq hüququn təmin edilməsi, dövlətlərin ərazi bütövlüyünün qorunması, aqressiya və təcavüzün qarşısının alınması kimi mühüm təşəbbüslərlə çıxış edib. Qoşulmama hərəkatının rəhbəri kimi qlobal pandemiya başlayandan bəri çoxsaylı tədbirlər həyata keçirib, hətta mövzu ilə bağlı BMT Baş Assambleyasının xüsusi iclasının keçirilməsinə nail olub. İnkluzivlik, bərabərlik, COVID-19-a qarşı birgə mübarizə üçün ortaq resursların səfərbər edilməsinin təşkili istiqamətində mühüm addımlar atıb. Eyni zamanda ikitərəfli münasibətlərdə ayrı-ayrı ölkələrlə və beynəlxalq təşkilatlarla nümunəvi tərəfdaşlıq platformaları yaradıb. Bütün bunlar isə, Azərbaycan Prezidenti İlham Əliyevin fəaliyətinin daima diqqət mərkəzində olması və təqdir edilməsini şərtləndirib. Ona görə də, 28 May Respublika Günü münasibətilə Azərbaycan Prezidentinin ünvanına gələn təbrik məktublarının məzmununda bu strateji məsələlər və onların öz həllini tapmasında Prezident İlham Əliyevin rolu xüsusilə vurğulanır. Bu isə xalqımız və dövlətimiz adına hər birimizdə qürur yaradır”.

Tural Tağıyev
Azvision.az


Teqlər: Deputat   28-may   Prezident  





Xəbər lenti