Bu barədə açıqlama verən ABŞ Müdafiə Nazirliyinin rəsmisi Con Kirbi deyib ki, hərbçilərin əlavə kontingentinin əsas hissəsi həftənin sonunadək Əfqanıstanda yerləşdiriləcək. Bu kontingentə Kabil aeroportunda ABŞ diplomatlarının və mülki mütəxəssislərin ölkədən təhlükəsiz çıxarılmasını təmin edəcək üç tabor (üç min hərbi qulluqçu-red.) daxildir. Dəniz piyadası taborlarından biri artıq Kabildədir – digərləri isə növbəti bir neçə gün ərzində Əfqanıstanın paytaxtına gələcək. İstirahət günlərinin sonuna qədər üç minlik hərbi kontingentin əsas hissəsinin şəhərdə yerləşdiriləcəyi gözlənilir.

İngiltərə Əfqanıstana 600 hərbçi göndərir

Pentaqonun nümayəndəsi həmçinin qeyd edib ki, hazırda “Taliban” qüvvələri Əfqanıstan paytaxtını bilavasitə təhdid etmir, lalin onu ölkənin əsas hissəsindən təcrid etməyə çalışır. Vaşinqtonda taliblərin sürətlə irəliləməsini “böyük həyəcanla” izləyirlər.

Xatırladaq ki, dünən İngiltərənin müdafiə naziri Ben Uolles də Əfqanıstana ingilis hərbçilərin göndəriləcəyini açıqlamışdı. 600 nəfərlik heyət ingilis vətəndaşların ölkəni tərk etməsinə kömək edəcək.

Tural Tağıyev
Azvision.az