Pəncşirdəki müqavimət qüvvələrinin taliblərə məğlub olması xəbərindən sonra ingilis ordusunun zabitləri, Taliban silahlılarını əks etdirən yeni fotoşəkilləri təhlil ediblər. Maraqlıdır ki, Taliban tərəfindən döyüşən yaraqlılar arasında keçmiş hökumət qüvvələrinə məxsus əsgərlər də olub. Bu barədə məqalə dərc edən "The Times" yazır ki, Əfqanıstan qoşunları hərbi əməliyyatlarda İngiltərə, ABŞ və NATO ölkələrindən olan təlimatçılardan öyrəndikləri üsullardan istifadə edirlər.
Taliban Pəncşirə yeni qubernator təyin etdi |
"Bu səbəbdən də belə ehtimal edilir ki, əfqan əsgərləri üsyançıların Pəncşir əyalətində məğlubiyyətindən sonra Taliban tərəfinə keçiblər",-məqalədə yazılıb.
"Dragonfly" kəşfiyyat təşkilatından olan ingilis hərbi analitik Barbara Kelemen də belə qənaətə gəlib ki, taliblər tərəfindən döyüşənlər məhz bir vaxtlar Qərbin təlim keçdiyi hökumət qüvvələrində xidmət etmiş əsgərlər olublar. O qeyd edib ki, Əfqanıstan silahlı qüvvələrinin bir çox əsgəri müxtəlif səbəblərə görə ordu sıralarını tərk edərək taliblərin tərəfinə keçib. Bu səbəbdən də o Pəncşirlə bağlı ortaya atılmış yeni fərziyyəni tam olaraq qəbul edir. Klemenə görə, peşəkar hərbçiləri bu addıma məcbur edən bir sıra səbəblər olub. Bunların arasında Talibanla keçmiş əlaqələrin mövcudluğu, iqtisadi maraq, şəxsi və ailə təhlükəsizliyinin qorunması amilləri var.
Qeyd edək ki, hələ Pəncşir əməliyyatından əvvəl Taliban Əfqanıstanda hərbi əməliyyatların bitdiyini elan etmişdi.
Tural Tağıyev
Azvision.az