"Sərt qapanmalara getmək arzuolunan deyil" - Deputat

   "Sərt qapanmalara getmək arzuolunan deyil" -    Deputat
  29 Noyabr 2021    Oxunub:289
"Koronavirusun yeni “Omikron” variantının aşkar edilməsi bir sıra ölkələrin yenidən qapanma qərarları verməsinə səbəb olub. Dünyanın 3-cü ən böyük iqtisadiyyatına malik olan Yaponiya xaricilərin bu ölkəyə gəlməsinə qadağa tətbiqetmə niyyətindədir. İsrail 2 həftəlik qapanmaya getməyi planlaşdırır. ABŞ 8 ölkədən Birləşmiş Ştatlara səfərləri yasaqlayıb".
AzVision.az xəbər verir ki, bu barədə iqtisadçı deputat Vüqar Bayramov "facebook"da yazıb.

Deputat bildirib ki, "Omikron"un aşkar edilməsi dünya birjalarına, eləcə də neft bazarına ciddi təsir etsə də, birjalar həftəyə nikbin başladılar. Ötən həftənin son iş günü 10 faizdən çox ucuzlaşan neft bu həftəyə 4 faizə yaxın artımla başlayıb. Hazırda “Brent” markalı neftin 1 barelinin qiyməti 75 dollardan baha satılır. "Omirkon" variantından ehtiyatlansalar da, birjalar aparıcı ölkələrin daha geniş qapanmalara getməyəcəyinə ümidlüdilər. Belə ki, ABŞ daxil olmaqla bir sıra inkişaf etmiş ölkələr "Omikron" variantının araşdırılması üçün ən azı 1 həftə zaman lazım olduğunu bəyan ediblər.

"Digər tərəfdən, bir sıra ölkələr qapanma qərarı versələr də etiraf etmək lazımdır ki, dünya sərt karantinlərdən, yumşaq desək, bezib. Buna görə də, ölkələr “lock down” qərarlarını ehtiyatla qəbul edirlər. Azərbaycan yumşaq karantin rejimini tətbiq edən ölkələrdəndir. Təbii ki, "Omikron" variantının təsirləri və yayılma coğrafiyası və eləcə də tezliyindən asılı olaraq növbəti addımlar müəyyənləşəcəyi gözlənilir. Bununla belə, indiki halda yenidən sərt qapanmalara getmək arzuolunan deyil. Real sektordakı açılımların və yenidən bərpa olunan aktivliyin qorunub saxlanması vacibdir. Bununla belə, dünya bazarlarındakı və eləcə də neft birjalarında kəskin dalğalanmalar bir daha təsdiq edir ki, hər zaman xarici şoklar aktiv ola bilər".

AzVision.az

Teqlər: Vüqar-Bayramov   Omikron  







Xəbər lenti