Dövlət Komitəsində britaniyalı analitiklərlə görüş olub
Prezident İlham Əliyevin məcburi köçkünlərin sosial müdafiəsinin təşkilinə, yaşayış şəraitinin yaxşılaşdırılmasına, məşğulluğunun artırılmasına xüsusi diqqət yetirdiyi, Birinci vitse-prezident xanım Mehriban Əliyevanın bu sahədəki təşəbbüslərinin böyük əhəmiyyət daşıdığı bildirilib. Qeyd edilib ki, Ermənistanın otuz ilə yaxın müddətdə işğalda saxladığı, ötən il 44 günlük müharibə nəticəsində azad edilmiş ərazilərdə Azərbaycan dövləti geniş bərpa-quruculuq işlərinə başlayıb, məcburi köçkünlərin təhlükəsiz şəraitdə, könüllülük prinsipi əsasında və ləyaqətlə öz tarixi torpaqlarına qayıdışına hazırlıq görülür.
İşğaldan azad edilmiş ərazilərdə təhlükəsizliyin təmin olunması və minatəmizləmə işlərinə Böyük Britaniyanın verdiyi dəstək minnətdarlıq hissi ilə qeyd olunub, bunun ölkələrimiz arasında qarşılıqlı etimada əsaslanan əlaqələrin daha da möhkəmləndirilməsinə xidmət etdiyi bildirilib.
Britaniyalı analitik Ryan Qrist Azərbaycana səfərdən məmnunluq duyduqlarını vurğulayıb, münaqişənin başa çatmasını, işğaldan azad edilmiş ərazilərdə bərpa-quruculuq işlərinin aparılmasını yüksək dəyərləndirib. Postmünaqişə dövründə qarşıya qoyulan məqsədlər, keçmiş münaqişə zonasında dinc birgəyaşayışla bağlı qonaqların sualları cavablandırılıb. Həmçinin bu sahədə əməkdaşlıq imkanlarına toxunulub, fikir mübadiləsi aparılıb, qarşılıqlı maraq doğuran digər məsələlər müzakirə edilib.
AzVision.az