|
| Qarabağdan qaçan ermənilər İrəvanda aksiya keçiriblər- VİDEO |
- Biz "qırğınlar"dan qaçdıq və Ermənistana gəldik. Niyə bizə status vermək istəmirlər? – aksiya iştirakçılarından biri jurnalistlərə deyib.
O fikirlərinə onu da əlavə edib ki, Ermənistanın baş naziri açıq şəkildə deyir ki, Laçın şəhəri ilə Zabux kəndi SSRİ dövründə keçmiş Dağlıq Qarabağ Muxtar Vilayətinin tərkibində olmayıb və onları Bakıya təhvil vermək lazımdır.
- Amma Hadrut, Əsgəran rayonlarının bir sıra kəndləri də DQMV-nin tərkibində olub və onların "sakinləri" də öz evlərinə qayıtmalıdır. O zaman niyə hakimiyyət bizə qaçqın statusu vermir ki, sonradan beynəlxalq hüquq normalarına uyğun olaraq bu məsələni qaldırsınlar? - nümayişçilərdən biri gileylənib.
Aksiya iştirakçılarının sözlərinə görə, onlar artıq XİN-də, Ombudsman Aparatında, Dövlət Miqrasiya Xidmətində keçirdikləri görüşlərdə bu məsələni qaldırıblar. Orada etirazçılara deyiblər ki, onların problemi siyasi məsələdir.
Aksiyanın təşkilatçısı “Hadrut naminə” qeyri-hökumət təşkilatının rəhbəri Levon Hayriyan isə deyib ki, sabah səhər saat 11-də yenidən hökumət binasının qarşısına toplaşacaqlar və bundan sonra BMT-nin daimi nümayəndəliyi, Xarici İşlər Nazirliyi, Fransa və ABŞ səfirlikləri qarşısında piket keçirəcəklər.
Tural Tağıyev
AzVision.az
Vaxtında, Aydın, Lazımlı!
