Paşinyanın Türkiyə və Azərbaycan liderlərinin yanında acizanə şəkildə dayanaraq görüşlərin sonunda rəsmi Bakının xeyrinə olan qərarlarla razılaşması isə ermənilərin milli faciələrinin kulminasiya nöqtəsi kimi qiymətləndirilir.

"Jam" saytında dərc edilən təhlil bu mənada diqqət çəkir. Müəllif yazır ki, Çexiya paytaxtında aparılan müzakirələrin ən obrazlı və təsirli təsvirini məhz Praqadan gələn fotolardakı diqqət çəkən epizodlar çatdırır. Bir tərəfdə qalib ölkənin rəhbəri, digər tərəfdə isə boynu bükük pozada durmuş Nikol.

Səbatsız baş nazir Praqa görüşləri ilə təkcə faktiki deyil, həm də de-yure Qarabağdakı azsaylı ermənilərin öz müqəddəratını təyinetmə hüququnu qorumaqdan imtina etdi. Başqa sözlə, 1988-ci ildən bəri qondarma ad verilən "Artsax"ın öz müqəddəratını təyin etməsinə yönəlmiş separatçı səylər, ümidlər indiki hakimiyyətin dörd illik fəaliyyəti nəticəsində, məhz Paşinyan tərəfindən tamamilə puça çıxarıldı.

Paşinyanın davranışları diplomatik süqutunun ifadəsinin təsdiqidir - Praqa zəfərinin şərhi

"Bu gün Paşinyanın Ermənistandakı əsl missiyası artıq hər kəsə aydındır. O, əvvəlcə Ermənistan ordusunu, sonra Qarabağ müharibəsi qəhrəmanlarını gözdən saldı. Nikol bizim keçmiş qələbəmizin bütün simvollarını da gözdən saldı. O, Ermənistan-Rusiya münasibətlərini korladı və nəhayət, bütün bunlardan sonra, onun israrlı səyləri nəticəsində ATƏT-in Minsk qrupu formatında olan danışıqlar da pozulub. Nikol Azərbaycanın torpaqları geri qaytarmasına hüquqi əsas vermişdi və yalnız bundan sonra 9 noyabr tarixli alçaldıcı müqaviləni imzalamağa məcbur oldu. Lakin o, bununla da dayanmadı. 2020-ci ildən başlayaraq, iki il ərzində ölkənin bütün dövlət qurumlarının dağıdılması prosesini davam etdirdi. Diplomatik platformalarda onsuz da çətin olan Ermənistan və Qarabağ məsələlərini iki əsas geosiyasi qütb arasında çəkişmə meydanına çevirdi.

Nəticədə Azərbaycan nəinki Qarabağ məsələləri ilə bağlı mövqeyini gücləndirə bildi, həm də artıq Ermənistanın ərazi bütövlüyü şübhə altına alınır", - analitik yazıb.

O da vurğulanır ki, Paşinyanın uğursuz fəaliyyəti sayəsində bu gün Qarabağ məsələsi Azərbaycanın daxili işinə çevrilib, xarici qüvvələrin heç biri bura nüfuz edə bilmir. Bu da azmış kimi, Ermənistanın ərazi bütövlüyü məsələsi əsas geosiyasi mərkəzlər arasında mübahisə predmetinə çevrilib.

Praqada keçirilən görüşlər isə göstərdi ki, Paşinyan ancaq Ermənistanın təhlükəsizliyi məsələsini müzakirə obyektinə çevirə bilib. Bundan İrəvan yalnız zərər görəcək.

Tural Tağıyev
AzVision.az