“Türk dövlətləri KTMT-də sözünü deməlidir” -

“Türk dövlətləri KTMT-də sözünü deməlidir” - Bişkekdən rəy

09:13 10 Aprel 2023 Oxunub:4246

“Ermənistan hakimiyyəti KTMT ilə oynayır. Baş nazir Nikol Paşişyan bildirib ki, Ermənistan KTMT-ni deyil, KTMT Ermənistanı tərk edir. Rusiya buna reaksiya verməli idi. Ukrayna ilə münaqişəyə görə Rusiya bu il Cənubi Qafqazda möhkəmlənmək fürsətini əldən verib. Odur ki, bu bölgədə dirçəlməyə çalışır”.

Bunu AzVision.az -a Qırğızıstanın Dövlət Siyasətinin Təhlili Mərkəzinin direktoru Almaz Tacıbay Rusiya Xarici İşlər Nazirliyinin nümayəndəsi Mariya Zaxarovanın Moskvanın Ermənistana KTMT missiyası göndərmək istəyi ilə bağlı bəyanatını şərh edərkən deyib.

Onun sözlərinə görə, KTMT qoşunlarının istənilən ölkəyə yeridilməsi qərarını parlamentlər ratifikasiya etməlidir: “Eyni zamanda, biz Ermənistanın sərhədlərini qorumaq üçün KTMT qoşunlarını rəsmən dəvət edib-etmədiyini aydınlaşdırmalıyıq. Azərbaycan və Ermənistan sülhə razılaşdıqları bir zamanda KTMT qəfildən Ermənistanın suverenliyinə təhlükənin olduğunu bəyan edir. KTMT-yə üzv olan türk ölkələri - Qazaxıstan və Qırğızıstan Azərbaycan və Türkiyə ilə münasibətlərinə görə belə bir qərarın qəbuluna mane olmalıdırlar. Yoxsa hansı türk birliyindən danışmaq olar? Ola bilsin ki, bu, türk ölkələrinin Türk Dövlətləri Təşkilatı çərçivəsində birləşmə meylinin nə dərəcədə güclü olduğunu yoxlamaq məqsədilə edilir”.

Almaz Tacıbay inanır ki, Qazaxıstan və Qırğızıstan vətəndaşları Azərbaycandakı türk qardaşlarına qarşı qərarların əleyhinə olacaqlar. “Ancaq çağırışı Rusiya edib və hökumətimizin necə reaksiya verəcəyini görmək çox maraqlıdır. Qırğızıstan prezidenti Qazaxıstandan daha loyal və Rusiyadan daha çox asılıdır. Amma onun razılıq verəcəyini düşünmürəm. Azərbaycanla Ermənistan arasında sərhədlərin demarkasiyası və delimitasiyası prosesinə etik və hüquqi baxımdan qarışmaq olmaz. Üstəlik, Ermənistana qarşı birbaşa təcavüz təhlükəsi yoxdur, hərçənd, bu, İrəvan və Moskva üçün sərfəli olardı. Bu halda Rusiya Ukrayna ilə müharibəyə baxmayaraq, Qafqazda vəziyyətə nəzarət edə bilər”, - Tacıbay bildirib.

Samir Vəliyev
AzVision.az

Teqlər: KTMT