Bunu AzVision.az -a hərbi ekspert, Latviya silahlı qüvvələrinin istefada olan zabiti Eynars Qraudins deyib. O bildirib ki, Rusiyanın Ukraynaya təcavüzü ilə əlaqədar olaraq, postsovet məkanında onun maraqlarına xidmət edən strukturların dağıdılması tamamilə məntiqlidir.

Hərbi ekspert əmindir ki, MDB və KTMT-ni hansısa konfliktləri həll etməyə qadir strukturlar hesab edənlər dərindən yanılırlar. Azərbaycanla Ermənistan arasındakı vəziyyətə gəlincə, hər şey çox sadədir. Son 30 ildə Kreml erməni separatizmindən istifadə edərək, siyasi və iqtisadi dividentlər qazanmağa çalışıb.

“Aydındır ki, artıq Rusiya sülhməramlıları heç nəyi həll etmirlər. Qlobal miqyasda Rusiyanın “sülhməramlı səylərinə” artıq heç kim ciddi yanaşmır. Ona görə də ermənilərə məsləhətim odur ki, Azərbaycanın qalan torpaqlarını da azad etsinlər. Heç nəyi məhv etmədən sakitcə çıxıb getsinlər. Əminəm ki, onlara rahatca getməyə icazə veriləcək. Sonra Azərbaycanla Ermənistan arasında dövlət sərhədi haqqında saziş bağlansın. Qarabağda yaradılan hansısa psevdodövləti unutmaq lazımdır. Ermənistan boynuna almalıdır ki, səhv edib və bu ona baha başa gəlib. Dünya Ermənistanın hərəkətlərini başa düşəcək. Azərbaycan və Ermənistana dinc səma arzulayıram”, - E.Qraudins bildirib.

Samir Vəliyev
AzVision.az