Tədbirdə BMT-nin sabiq Baş katibinin müavini Erik Solheym və Çin Dövlət İqlim Mərkəzinin direktoru Kao Çinqken də daxil olmaqla tanınmış şəxslər iştirak ediblər. Dialoq zamanı Müasir Çin və Dünya Araşdırmaları Akademiyasının vitse-prezidenti Fan Daçi və “French Bridge” (Fransız Körpüsü) beyin mərkəzinin sədri Gou Rui tərəfindən “Çin-Fransa iqlim və dayanıqlı inkişaf əməkdaşlığı: problemlər, imkanlar və perspektivlər” hesabatı təqdim edilib.

Digər diqqətəlayiq məruzəçilər arasında Çinqhua Universitetinin İqlim Dəyişikliyi İnstitutunun vitse-prezidenti Ganq Cien, Fransa Enerji 2050-nin prezidenti Stefan Buffari, Çinqhua Universitetinin Enerji, Ətraf Mühit və İqtisadiyyat İnstitutunun müdir müavini Tenq Fey, Xəzər Universitetinin rektoru İradə Xəlilova və digərləri olub.

Xəzər Universitetinin rektoru İradə Xəlilova Çinə səfərlərindən təəssüratlarını bölüşərək, ölkənin elm, texnologiya və dayanıqlı inkişafa yönəlmiş əhəmiyyətli nailiyyətlərini təqdir edib. O, Xəzər Universitetinin dayanıqlılıq tədqiqatlarına sadiqliyini vurğulayıb və konfransda qlobal iqlim əməkdaşlığının gücləndirilməsi üçün daha güclü beynəlxalq konsensusun əldə olunacağına ümid etdiyini bildirib. Rektor İradə Xəlilova, eyni zamanda, Xəzər Universiteti Çin Tədqiqatlar Mərkəzinin fəaliyyəti, Azərbaycan-Çin elmi əlaqələrinin inkişafında rolundan bəhs edib.

Tədbir COP29 çərçivəsində hökumətlər, tədris qurumları, müəssisələr və vətəndaş cəmiyyətinin töhfələrini bir araya gətirərək, çoxtərəfli dialoqu təşviq etməkdə mühüm addım olub. Avropa İttifaqı Asiya Mərkəzi, Çinqhua Universitetinin İqlim Dəyişikliyi İnstitutu və Xəzər Universiteti Çin Tədqiqatlar Mərkəzinin dəstəyi ilə keçirilən dialoqda Çin, Fransa, Azərbaycan və müxtəlif qlobal təşkilatlardan olan beynəlxalq ekspertlər, hökumət rəsmiləri, biznes liderləri və gənc nümayəndələr iştirak ediblər.

AzVision.az