Bunu ABŞ Dövlət Departamentinin Enerji Resursları Bürosunun baş məsləhətçisi Erik Ceykobs Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

O bildirib ki, ambisiyanın təcəssümü olan Cənub Qaz Dəhlizi Azərbaycanın zəngin enerji daşıyıcılarını nəinki ölkənin, həmçinin regionun rifahı üçün istifadə etməyə imkan verir.

“Bununla da, Azərbaycan artıq onlarla ölkənin etibarlı təchizatına çevrilib. ABŞ kimi Azərbaycan da nəhəng enerji ehtiyatlarına malikdir. ABŞ Prezidenti Donald Tramp enerjini Amerikanın üstünlüyünün təməl daşı və onun təhlükəsizliyinin açarı adlandırırdı. Ölkəmizin enerji zənginliyi sayəsində iqtisadi imkanlar yaratmaq, səhiyyə və təhsili təkmilləşdirmək, vətəndaşlarımızın həyatlarını yaxşılaşdırmaq hər yaxşı ölkənin vəzifəsidir”,- deyə o qeyd edib.

O vurğulayıb ki, təbii qaz artıq qeyri-müəyyən və bilinməyən enerji gələcəyinə keçid üçün aralıq rolunu oynayan yanacaq kimi qəbul edilmir: “Təbii qaz hamımız üçün etibarlı, əlçatan və təhlükəsiz enerji mənbəyidir və gələcək on illiklərdə də belə olacaq. Seçim yanacağı olan təbii qaz artıq qlobal enerji tələbatını qarşılamaq üçün vacibdir. Bir neçə gün əvvəl Səngəçal terminalında oldum. Görünür ki, Azərbaycan təbii qazın ölkənin, Avropanın və bütün dünyanın gələcəyi üçün əsas enerji mənbəyi olduğunu heç vaxt unutmayıb. Ölkəmiz, o cümlədən ABŞ şirkətləri sizin və enerji sənayenizin iqtisadi artımı və enerji təhlükəsizliyi üçün imkanları müəyyənləşdirmək və sürətləndirmək məqsədilə tərəfdaş olmağı səmimiyyətlə arzulayır”.

AzVision.az