"Oddity Central"ın yaydığı məlumata görə, qısa zamanda varlanmaq istəyən insanlar dələduzların qurbanı olublar. Fırıldaqçılar qurbanlarına saxta xəzinə xəritələri satıblar.

Gölə düşən üzüyü axtarırdı, xəzinə tapdı

"Türkiyə polisi insanlara saxta xəzinə xəritələri satmaq və "qiymətli" tapıntıları bazara çıxarmaqda köməklik edərək insanlardan pul qoparan bir qrup fırıldaqçını həbs edib. Əməliyyat ölkənin doqquz vilayətində keçirilib. Polisin xüsusi əməliyyatları zamanı onlarla cinayətkar saxlanılıb. İlkin məlumatlara görə, zərərçəkənlər kənd sakinləri olublar. Vətəndaşlara ümumi dəymiş ziyan 1,3 milyon dolları ötüb", - nəşr yazıb.

Qeyd edilib ki, cinayətkarlar yaxşı qurulmuş bir sxem üzrə hərəkət edirlərmiş. Onlar kəndləri gəzərək yerli sakinlərə guya keçmişdə əl ilə çəkilmiş "qədim" xəzinə xəritələrinin satışını təklif ediblər. Kağız süni şəkildə köhnəlmiş görkəmə salınıb və xəritələrdə qurbanlara yad olmayan real yerlər əks olunub: "Cinayətkarlar özlərini bölgəyə yad biri, sadəcə ziyarətçi kimi təqdim edərək, xəritədəki ərazi ilə tanış olmadıqlarını bildiriblər. Onlar onsuz da xəritədəki əraziləri tanımadıqları üçün axtarışa çıxmayacaqlarını deyiblər. Bu amili əsas gətirən canilər xəritəni satmağı təklif ediblər. Hətta o da təklif olunub ki, əgər alıcı razılaşsa və axtarışa başlayıb nə isə tapsa, fırıldaqçılar tapıntının alqı-satqısı üçün yenidən onunla əlaqə saxlayacaqlar".

Sonrakı mərhələdə isə cinayətin qurbanları "xəzinə"ni tapdıqlarını bəyan edirlərmiş. Bu, adətən əvvəlcədən ərazidə basdırılmış üzəri qızılı su ilə örtülmüş saxta sikkə və s. qədim cəvahirata oxşayan əşyalar olub. Həmin vaxt fırıldaqçılar özlərini keşiş kimi təqdim edən ortaqlarını prosesə cəlb ediblər. O isə videozəng vasitəsilə tapıntının dəyərini “təsdiq edib”. Lakin tapıntıları mədəni dəyərlərinə görə Türkiyədə satmağın mümkün olmadığı qarşı tərəfə izah olunub. Bunun əvəzinə keşiş xüsusi xidmət üçün əvvəlcədən ödəniş tələb edərək sikkələri xaricdə satışına kömək etməyi təklif edib. Pulları alan cinayətkar dəstə dərhal yoxa çıxıblar.

Tural Tağıyev
AzVision.az