Netanyahu Trampla görüşmək istəyir

   Netanyahu Trampla görüşmək istəyir
  05 Aprel 2025    Oxunub:449
İsrailin baş naziri Binyamin Netanyahu idxal tariflərinin ləğvi ilə bağlı danışıqlar aparmaq üçün Ağ Evdə ABŞ prezidenti Donald Trampla şəxsən görüşməyi planlaşdırır.
AzVision.az xəbər verir ki, vəziyyətdən xəbərdar olan mənbəyə istinad edən Amerikanın “Axios” portalının yazdığına görə, Netanyahunun Vaşinqtona səfəri aprelin 7-də baş tuta bilər. Liderlərin ABŞ-nin İsrail idxalına tətbiq etdiyi rüsumlardan əlavə, Qəzza zolağındakı vəziyyəti və ABŞ-İran nüvə sazişini müzakirə edəcəyi gözlənilir.

“Səfər əvvəlcə aprelin ortalarına planlaşdırılıb. Lakin Netanyahunun iştirak edəcəyi korrupsiya işi ilə bağlı yaxın vaxtlarda İsraildə keçiriləcək məhkəmə iclaslarına görə səfərin vaxtı hələ də dəyişə bilər”, - mənbələr portala açıqlamada deyiblər.

Nəşrin yazdığına görə, İsrailin baş naziri ABŞ və İran arasında nüvə sazişinin bağlanma şanslarının son dərəcə az olduğunu düşünür və diplomatiya uğursuz olarsa, İranın nüvə obyektlərinə zərbə endirmək barədə Trampla razılaşmaq istəyir.

İsrailin baş nazirinin tezliklə ABŞ-yə gələcəyini bir gün əvvəl Donald Trampın özü də təsdiqləyib. Aprelin 4-də ABŞ prezidenti ölkə başçısının “Air Force One” təyyarəsində jurnalistlərə bildirib ki, Beynəlxalq Cinayət Məhkəməsinin (BCM) onun barəsində həbs qərarı çıxarmasına baxmayaraq, Macarıstanın baş naziri Viktor Orban və həmin vaxt Budapeştə səfər edən Netanyahu ilə telefon danışığı olub.

Liderlər Macarıstanın BCM-dən çıxmasını müzakirə ediblər və tariflər mövzusuna toxunublar. Bundan sonra Tramp Netanyahunu mövzu ilə bağlı müzakirə aparmaq üçün Vaşinqtona dəvət etsə də, dəqiq tarix göstərməyib.

Sahil İsgəndərov
AzVision.az


Teqlər: Netanyahu   Tramp   görüş  





Xəbər lenti