FES pauza götürdü

FES pauza götürdü
  08 May 2025    Oxunub:576
ABŞ-nin Federal Ehtiyat Sistemi (FES) əsas faiz dərəcəsini 4,25%-4,5% diapazonunda saxlamaq qərarına gəlib. Bu, məzənnənin dəyişməz qalması barədə üçüncü dəfə ardıcıl şəkildə qəbul olunan qəraradır.
AzVision.az xarici KİV-lərə istinadən xəbər verir ki, FES-in sədri Cerome Pauell, yeni tariflər də daxil olmaqla, prezident Donald Tramp administrasiyasının ticarət siyasətləri ilə bağlı artan iqtisadi qeyri-müəyyənliyi nəzərə alaraq, mərkəzi bankın ehtiyatlı yanaşma nümayiş etdirdiyini vurğulayıb. Onun sözlərinə görə, yüsək inflyasiya və işsizlik riskləri, iqtisadi perspektivlə bağlı qeyri-müəyyənlik artıb.

“Prezident Trampın iqtisadiyyatı stimullaşdırmaq üçün dərəcələri azaltmaq üçün təzyiqinə baxmayaraq, FES müstəqil olaraq qalır və siyasi təhdidlərdən çox iqtisadi göstəricilərə əsaslanır”, - “Business Insider” onlayn-media şirkəti yazır.

Tramp FES-in rəhbərini hədələyib
FES-in qərarının açıqlanmasından sonra ABŞ fond bazarlarında yüksəliş qeydə alınıb. S&P 500 0,4%, Dow Jones 0,7%, Nasdaq isə 0,3% bahalaşıb. Lakin bu qısamüddətli qazanclara baxmayaraq, ilin əvvəlindən bəri bütün əsas indekslər tənəzzülə məruz qalıb.

FED gələcəkdə faiz dərəcələrinin dəyişdirilməsi ehtimalını istisna etmir, lakin iqtisadi göstəricilərin əlavə təhlilinin zəruriliyini vurğulayır. İqtisadi vəziyyətin necə inkişaf etməsindən asılı olaraq, faiz dərəcələrinə yenidən baxılmasının sentyabrdan tez baş verəcəyi gözlənilmir.

Qeyd edək ki, ABŞ dolları dünyanın vahid ehtiyat valyutası olduğundan FES-in fazi dərəcələrini bu və ya digər şəkildə dəyişməsi birjalarda və qiymətli kağızlar bazarlarındakı vəziyyətə və qlobal iqtisadiyyata birbaşa təsir göstərir.

Sahil İsgəndərov
AzVision.az


Teqlər:   ABŞ   FES   pauza  





Xəbər lenti


Azvision.az ©2014 | Bütün hüquqları qorunur