Komitənin sədri Azay Quliyev açılış çıxışında müasir dövrün ən mühüm çağırışlarına – iqlim dəyişikliyi, texnoloji yeniliklər, su çatışmazlığı, korrupsiya və qeyri-sabit iqtisadi mühitə diqqət çəkdi.

O, xüsusilə Rusiya Federasiyasının Ukraynaya qarşı təcavüzkar müharibəsinin artıq dördüncü ilə keçdiyini vurğuladı və bu işğalın təkcə insan itkilərinə deyil, həm də Ukraynada və daha geniş ATƏT regionunda ətraf mühitə və iqtisadi sabitliyə ciddi zərbə vurduğunu qeyd etdi.

"Rusiyanın son həftələrdə dinc əhalini və mülki infrastrukturu hədəf alan genişmiqyaslı hava hücumları narahatedici şəkildə artmaqdadır. Bu müharibə dərhal dayandırılmalıdır", – deyə Azay Quliyev bildirib.

O, eyni zamanda, Ukraynanın ərazi bütövlüyü, suverenliyi və müstəqilliyinə qətiyyətli dəstəyini ifadə edib və ATƏT PA-nın Ukraynanın müharibədən sonrakı bərpasına, iqtisadi sabitləşməsinə, enerji təhlükəsizliyinə və ekoloji reabilitasiyasına yönəlmiş siyasətləri dəstəkləməyə davam edəcəyini bildirib.

Çıxışında iqlim dəyişikliyinin təhlükəsizlik üçün artan təhdid olduğunu vurğulayan Komitə sədri daha iddialı və kollektiv tədbirlərin vacibliyini qeyd edib: “Elə davranmalıyıq ki, sanki ikinci bir planet yoxdur.”

Azay Quliyev həmçinin süni intellekt və texnoloji təhlükəsizlik sahəsində regional əməkdaşlığın genişləndirilməsini, bu məqsədlə ATƏT PA çərçivəsində yeni Ad Hoc Komitənin yaradılmasını təklif edib.

O, çıxışının sonunda komitənin gündəliyinin artan aktuallığını vurğulayaraq, ATƏT regionunda davamlı inkişaf, texnoloji tərəqqi və ətraf mühitin mühafizəsi naminə parlamentlərarası əməkdaşlığın gücləndirilməsinə çağırıb. Komitənin iclası ATƏT PA-nın yutub və fesbuk hesabı üzərindən canlı yayınlanıb.

AzVision.az