Cahangir Hacıyevin “BankTechnique”ə sədr təyin edilməsi ilə bağlı xəbərlərə bank rəsmi şəkildə aydınlıq gətirib.
“BankTechnique”in marketinq şöbəsinin rəisi Rövşən Kazımov AzVision.az-a bildirib ki, bu ilin fevral ayından indiyə kimi “BankTechnique”də idarə heyətinin sədri vəzifəsi boş qalır, bu vəzifəyə hər hansı təyinat həyata keçirilməyib.
“Cahangir Hacıyevin bankın idarə heyətinə sədr təyin olması ilə bağlı heç bir iclas keçirilməyib, müzakirələr də aparılmayıbş Bu məlumatlar doğru deyil”.
R. Kazımov qeyd edib ki, hazırda banka idarə heyətinin sədrinin birinci müavini Yaşar Cəfərov rəhbərlik edir:
“Bu məlumatlar doğru deyil. Keçən dəfə də demişik, indi də rəsmi olaraq bildiririk ki, Cahangir Hacıyev “BankTechnique” idarə heyətinin sədri vəzifəsinə təyin olunmayıb. Mən özüm hazırda bankdayam. Cahangir Hacıyevin də təqdimatı keçirilmir. O, bankda deyil. Hər gün çox sayda adam zəng vurub deyir ki, Cahangir Hacıyev sizin banka rəhbər gətirilir. İndi də onun təqdim olduğunu deyirlər. Vallah biz onu görməmişik. Sədr vəzifəsinə kim təyin olunsa, bu barədə mətbuata açıqlama veriləcək”.
Qeyd edək ki, yerli mətbuatda yayılan məlumatlara görə, Beynəlxalq Bankın keçmiş sədri Cahangir Hacıyev “BankTechnique”in İdarə heyətinin sədri vəzifəsinə təyin olunub. İddia olunur ki, bu gün C.Hacıyev bankda kollektivə təqdim olunacaq.
Hafiz Əhmədov
Bankda Cahangir Hacıyev müəmması - AÇIQLAMA
20 Aprel 2015
Oxunub:5181
Vaxtında, Aydın, Lazımlı!
