Səfirlikdən AzVision.az verilən məlumata görə, görüş zamanı E.Poluxov 2014-cü ildə xarici işlər naziri Elmar Məmmədyarovun Maputoya rəsmi səfəri zamanı Koutodan öncə olan nazir ilə görüşü xatırladaraq müzakirə olunan bir sıra məsələlərə toxunub. Bildirilib ki, Azərbaycan tərəfi Mozambik ilə enerji sahəsində əlaqələrin qurulması üçün hər zaman açıqdır və bunun üçün qarşılıqlı səfərlərin təşkil edilməsi zəruridir. Həmçinin ölkəmizin, yerləşdiyi regionda lider dövlət olduğundan müxtəlif sahələrdə əməkdaşlıq üçün geniş perspektivlərin mövcudluğu həmsöhbətin nəzərinə çatdırılıb. Sonra səfir nazir Koutoya Azərbaycanda sürətlə gedən inkişaf prosesi və ölkəmizin ağrılı Ermənistan-Azərbaycan, Dağlıq Qarabağ münaqişəsi haqqında ətraflı məlumat verib.

Cavab olaraq Kouto Azərbaycanın beynəlxalq aləmdə neft ölkəsi kimi tanındığı və bu sahədə geniş təcrübəyə malik olduğunun tanınmış fakt olduğunu söyləyərək rəhbərlik etdiyi nazirliyin bu təcrübədən bəhrələnmək arzusunda olduğunu vurğulayıb. Qeyd olunub ki, Mozambikdə son illər ərzində böyük təbii qaz yataqları açılıb və onların istismarı üçün ölkəyə təcrübəli mütəxəssislər tələb olunur və Azərbaycanın bu məsələdə köməkliyi çox dəyərli olardı.

Sonra tərəflər bir sıra praktiki məsələlər ətrafında fikir mübadiləsi aparıb.

Eyni tarixdə səfir E.Poluxov Mozambikin nəqliyyat və əlaqələndirmə nazirinin müavini xanım Manuela Joaquim Rebelo (Manuela Joaquim Rebelo) ilə görüş keçirib. Görüş zamanı nazir müavininə Azərbaycanda son on il ərzində həyata keçirilən regional və beynəlxalq əhəmiyyətli nəqliyyat və infrastruktur layihələr barəsində məlumat verilmiş və ölkəmizin Qərb ilə Şərq dünyasını birləşdirən loqistik mərkəzə çevrildiyi bildirib.

Cavab olaraq xanım Rebelo Mozambikin Afrikanın Alt Səhra bölgəsinə aparan əsas nəqliyyat mərkəzi olduğunu, ölkədə bir neçə dərin limanların və oradan kontinentin mərkəzinə aparan dəmir və avtomobil yollarının mövcudluğunu söyləyib. Bununla yanaşı nəqliyyat infrastrukturunun genişləndirilməsi üçün böyük tələbatın olduğunu bildirərək Azərbaycan tərəfini töhfə verməyə çağırıb.

Səfər çərçivəsində Səfir E.Poluxov həmçinin Mozambik Respublikasının Xarici İşlər və Əməkdaşlıq Nazirliyində və Dövlət Neft və Qaz şirkəti ENH-də bir sıra işgüzar görüşlər keçirib.

Azvision.az