AzVision.az Azərtac-a istinadən xəbər verir ki, qadınlar arasında 50 metr məsafədən üç vəziyyətdə tüfənglə, qadınlar arasında 25 metr məsafədən tapança ilə atəşaçma, həmçinin kişilər arasında qoşa səngər stendi yarışları keçirilib.

Qadınlar arasında 25 metr məsafədən tapança ilə atəşaçma yarışının təsnifat mərhələsinin sərrast atəş hissəsi artıq başa çatıb. Yarışlarda ölkəmizi təmsil edən İradə Aşumova bu mərhələni 17-ci yerdə başa vurub. Yarışlar iyunun 20-də davam edəcək.

Qadınlar arasında 50 metr məsafədən üç vəziyyətdə tüfənglə atəşaçma yarışlarının qalibi İtaliya idmançısı Petra Zublasinq olub. O, qızıl medal uğrunda serbiyalı İvana Maksimoviç, fransalı Laurens Brize, isveçrəli Petra Lustenberger, almaniyalı Beate Qauss, ukraynalı Nataliya Kalnyuş, avstriyalı Olivia Hofman və böyük britaniyalı Cennifer Makintoş ilə mübarizədə rəqiblərinə qalib gəlib.

İtaliyalı atlet sonuncu dünya rekordunu yeniləyərək 464.7 xalla birinciliyi təmin edib. İdmançı, həmçinin “Rio-2016” Yay Olimpiya Oyunlarında iştirak hüququ əldə edib.

İkinci yerə fransalı Laurens Brize, üçüncü yerə isə avstriyalı Olivia Hofman çıxıblar.

Qadınlar arasında 50 metr məsafədən üç vəziyyətdə tüfəng ilə atəş və kişilər arasında qoşa səngər stendi yarışlarında Azərbaycan təmsilçisi iştirak etməyib.

On altı idmançının iştirak etdiyi kişilər arasında qoşa səngər stendi yarışının təsnifat mərhələsindən yarımfinala 6 ölkə - Almaniya, Macarıstan, Rusiya, İtaliya, Böyük Britaniya və Slovakiya idmançıları yüksəliblər.

Bu yarışların qalibi Rusiya idmançısı Vitali Fokeyev olub. O, qızıl medal uğrunda mübarizədə macarıstanlı Riçard Boqnardan üstün oyun nümayiş etdirərək birinci Avropa Oyunlarının çempionu adını qazanıb. V.Fokeyev “Rio-2016” Yay Olimpiya Oyunlarında iştirak hüququ əldə edib.

İkinci yerə macarıstanlı Riçard Boqnar, üçüncü yerə isə italiyalı Antonino Barilla çıxıb.

Sonra qaliblər mükafatlandırılıb.

Medalları atletlərə Beynəlxalq İdman Atıcılığı Federasiyasının idarə heyətinin üzvü Kevin Kilti və Malta Olimpiya Komitəsinin prezidenti Culian Paçe Bonello təqdim ediblər.