İbrahimbəyov : “Nəyə görə Bakıya gəlməliyəm?”

  07 Avqust 2013    Oxunub : 381
İbrahimbəyov : “Nəyə görə Bakıya gəlməliyəm?”
“Mənim hazırda Bakıya gəlməyimin heç bir xeyri yoxdur”.
Demokratik Qüvvələrin Milli Şurasının sədri, prezidentliyə iddiaçı Rüstəm İbrahimbəyov bu gün “Media forum” saytına danışıb. O deyib ki, Rusiya vətəndaşlığının ləğvi üçün prezident Vladimir Putinin imza atmasını gözləyir: “Məndən asılı iş qalmayıb. Vətəndaşlığın ləğv olunmasına Rusiya prezidenti Vladimir Putin qol çəkməlidir. İndi onun cavabını gözləyirəm. Mənə elə gəlir ki, hər şey yaxşı olacaq”.

Rüstəm İbrahimbəyov qeyd edib ki, gözləməklə yanaşı başqa yollar da axtarır: “Azərbaycan Respublikasının vətəndaşlıq qanununa əsasən, dövlət ikinci vətəndaşlığı qəbul etmir. Ancaq o vaxt qəbul edir ki, həmin hökumətlə beynəlxalq sazişi olsun. Rusiya ilə Azərbaycan arasında belə müqavilə yoxdur.

Amma Azərbaycan Respublikasının Seçki Məcəlləsində ziddiyyətlər var. Mən Amerika və Rusiya hüquqşünasları ilə danışıram. Ola bilsin ki, ikinci vətəndaşlığımın ləğvi ilə bağlı sənədi seçkiyə qoşulduqdan sonra təqdim edim. Mən Rusiya vətəndaşlığından çıxmaq üçün ərizə vermişəm. Gec-tez bu məsələ həll olunacaq. Məsələ ləngisə, hüquqşünaslar bildirsə ki, sənədləri verə və imza kampaniyasına başlaya bilərəm, onda Bakıya həmin sənədsiz gələcəyəm. Sənəd sonra göndəriləcək”.

Şura sədri Müsavat başqanı İsa Qəmbərin Rüstəm İbrahimbəyovun namizədliyi qalmaq şərti ilə daha bir namizəd müəyyənləşdirmək təklifinə münasibət bildirib: “İsa bəy məndən öncə namizədliyini verib. Belə danışmışıq ki, mənim namizədliyim qeydiyyatdan keçsə, o, namizədliyini geri çəkəcək. Düşünürəm ki, Milli Şuranın yeganə namizədi olmalıdır. Başqa üzvlər isə Milli Şuradan yox, özləri namizədliyini verə bilər. Bu, ehtimallara qarşı düzgün hərəkət olar. Milli Şura bu məsələyə avqustun 12-də baxacaq və qərar çıxaracaq”.

Rüstəm İbrahimbəyov yaxınlarda Amerikaya getmə ehtimalının olduğunu da söyləyib: “Mənim hazırda Bakıya gəlməyimin heç bir xeyri yoxdur. Kimsə qəsdən istəyir ki, mən gəlim, işlərim əngəllənsin. Bunun mənası yoxdur. Burada mən görən işləri heç kim görə bilməz. Bu işləri nəyə görə atıb Bakıya gəlməliyəm? Lazım olanda gələcəyəm”.

Teqlər: