Azərbaycan Respublikasının Prezidenti yanında Bilik Fondu və Azərbaycan Milli Elmlər Akademiyasının birgə təşkilatçılığı ilə Sabunçu rayonundakı Nardaran qəsəbə 295 nömrəli tam orta məktəbin şagird və müəllim kollektivi AMEA-nın qonağı olub.

Bilik Fondundan verilən məlumata görə, Nardaran məktəbliləri AMEA-nın 70 illik yubileyi ilə əlaqədar olaraq, Milli Elmlər Akademiyasının elmi bölmələri və institutlarının keçirdiyi sərgi ilə tanış olublar. Şagirdlərə bölmə və institutların fəaliyyəti, AMEA-nın Azərbaycan elminin inkişafında rolu barədə geniş bilgilər verilib.

Sərgi şagirdlərin böyük marağına səbəb olub, onlar alimlərlə ünsiyyət yaradıb, suallarına cavab alıblar.

Bilik Fondunun icraçı direktoru Oktay Səmədov deyib: "Görüşlərimiz davamlı olacaq. Məktəblərdə, xüsusən Nardaranda fəaliyyət göstərən təhsil ocaqlarında alimlərin ustad dərslərini təşkil etməyi planlaşdırırıq. Bilik Fondunun "Ustad-şəyird” layihəsi var. Bu layihə çərçivəsində şagirdlərdə elmə erkən həvəs oyatmağa çalışırıq". Bilik Fondunun icraçı direktoru məktəbliləri əmin edib ki, belə tədbirlər mütəmadi olaraq keçiriləcək.

AMEA-nın Mərkəzi Elmi Kitabxanasında tanınmış alimlərin əsərləri ilə tanış olan şagirdlər zəngin məlumat alıblar.

Nardaran məktəbliləri "Tusi-Bohm" Planetariumunda əsrarəngiz mənzərə ilə tanış olublar. Planetariumun meneceri Famil Mustafa şagirdlər arasında astronomiyaya dair müsabiqə keçirib, qaliblərə hədiyyələr təqdim edilib. Kainatın yaranması haqqında film nardaranlı məktəblilərin böyük marağına səbəb olub.