Azvision.az xəbər verir ki, Zelenski Poroşenkonun debat təklifini qəbul edib. Lakin bununla belə ona meydan oxuyub. Belə ki, o, debatın 70 minlik Olimpiya stadionunda aparılmasını istəyib.

“Poroşenkoya səslənirəm. Məni canlı yayıma çağırdınız. Qaçacağımı, geri duracağımı, gizlənəcəyimi xəyal etdiniz. Xeyr. Mən, 2014-cü ildəki siz deyiləm. Bu dəvəti qəbul edirəm. Sizi burada, Olimpiya stadionunda gözləyəcəm. Debat bütün Ukrayna xalqının qarşısında olacaq və bütün telekanallar bu debatı canlı yayınlaya bilər. Amma namizədlər sağlamlıq yoxlanışından keçməli, xalqa alkoqol və narkotik aludəçisi olmadıqlarını göstərməlidirlər. Çünki ölkəmizin sağlam bir dövlət başçısına ehtiyacı var” – Zelenski bəyan edib.

Zelenski həm də Poroşenkonun onu “Kremlin kuklası” adlandıraraq təhqir etməsinə də münasibət bildirib: “Mənə hörmət etməlisiniz və debatın Kremlin ya da Kolomoyskinin (Ukraynalı miluyader) “kuklası” ilə, kloun ilə deyil, Ukrayna prezidentliyinə namizəd Vladimir Zelenski ilə olacağını xalqa söyləməlisiniz. 24 saat vaxtınız var. Fikirləşin.”

Qeyd edək ki, Ukrayna MSK-nin nəticələrinə əsasən, 31 martda keçirilən prezident seçkilərinin birinci turunda Vladimir Zelenski 30,24% səslə lider olub. Ölkənin hazırkı prezidenti Pyotr Poroşenko isə cəmi 15,95% səsi yığa bilib. Ukraynada prezident seçkilərinin ikinci turu aprelin 21-də keçiriləcək.

Leyla Elbrusqızı
Azvision.az