Naxçıvanda müəllimlərin qiymətləndirilməsinə başlanılıb

Naxçıvanda müəllimlərin qiymətləndirilməsinə başlanılıb
  13 May 2019    Oxunub:1642
Bu gündən muxtar respublikada müəllimlərin qiymətləndirilməsi başlayıb.
Azvision.az -ın məlumata görə, test mərkəzində Naxçıvan Muxtar Respublikasının dövlət ümumi təhsil müəssisələrində çalışan müəllimlərin bilik və bacarıqlarının qiymətləndirilməsinin aparılması üçün test imtahanlarına start verilib.

Test imtahanlarında iştirak etmək üçün 120 nəfər sənəd təqdim edib. İmtahanda iştirakçılara ixtisas üzrə ümumi fənn proqramına uyğun 40, metodika və təlim strategiyaları üzrə 25, informasiya texnologiyaları üzrə 15 sual olmaqla ümumilikdə 80 sual təqdim edilir, sualları cavablandırmaq üçün 120 dəqiqə vaxt verilir. Test imtahanları elektron proqram təminatı vasitəsilə keçirilir. Test imtahanlarında obyektivliyin və şəffaflığın tam təmin edilməsi məqsədilə imtahanların videoçəkilişi aparılır. Test imtahanı bitdikdən dərhal sonra iştirakçılara test imtahanının nəticəsinə dair arayış təqdim edilir. Test imtahanlarının nəticələri gündəlik olaraq Komissiyanın rəsmi internet portalında (www.dqmk.nmr.az) yerləşdirilir.

Məqsəd müəllimlərin bilik və bacarıq səviyyəsinin test üsulu ilə müəyyənləşdirilib üzə çıxarılması, qiymətləndirilmə aparılan müəllimlərin həftəlik dərs yükü normasının optimallaşdırılmasının, aylıq vəzifə maaşlarının artırılmasının və maddi rifahının yaxşılaşdırılmasının təmin edilməsidir.

Müəssisələrin rəhbərləri tərəfindən müəllimlər arasında dərs yükünün bölüşdürülməsi və onların karyera inkişafı zamanı qiymətləndirilmənin nəticələri nəzərə alınacaq, qiymətləndirilməsi aparılan müəllimlərin aylıq əməkhaqqı həftəlik dərs yükünə müvafiq olaraq artırılacaqdır.

Test imtahanları 18 may 2019-cu il tarixədək davam edəcəkdir.

Azvision.az



Teqlər: Müəllim   Naxçıvan  





Xəbər lenti