Ermənistanın keçmiş təbiəti mühafizə naziri 14 milyon

Ermənistanın keçmiş təbiəti mühafizə naziri 14 milyon dollar rüşvət alıb

21:05 13 Yanvar 2022 Oxunub:1593

Ermənistanın keçmiş təbiəti mühafizə naziri Aram Arutyunyanın 14 milyon dollar rüşvət alması ilə bağlı iş üzrə istintaq tamamlanaraq məhkəməyə göndərilib. AzVision.az xəbər verir ki, bu barədə Korrupsiyaya Qarşı Mübarizə Komitəsinin mətbuat xidməti məlumat yayıb.

Cinayət işində keçmiş deputat Aleksan Petrosyan, nazirlikdə işləmiş rəis müavini Suren Avakyan, Sevan psixiatriya xəstəxanasının keçmiş rəhbəri Qaqik Karapetyan, həmçinin Arutyunyanın qohumları Araks Dilanyan və Viktor Martirosyan da daxil edilib.

Sarkisyan məhkəmədə əsəbləşdi: "Siyasi sifarişə görə burdayam"

İstintaqmişində yer alan məlumata əsasən, Arutyunyan biznesmen Silva Hambardzumyandan onun şirkətlərinə 10 mədən lisenziyası verdiyinə görə 14 milyon dollar alıb. Pul hissə-hissə köçürülüb. 6 milyon Suren Avakyan, 8 milyon isə Arutyunyanın qohumları - Araks Dilanyan, Qaqik Karapetyan, Armen Xaçatryanın BƏƏ-dəki hesabları vasitəsilə göndərilib. Daha sonra pulun bir hissəsi nağdlaşdırılıb və ya Arutyunyanla onun həyat yoldaşına birbaşa verilib.

"Arutyunyan və Aleksan Petrosyan pulun bir hissəsini Virgin adalarında qeydiyyatdan keçmiş “Tarasco Investment” şirkətinin hesablarına göndəriblər. Şirkət də öz növbəsində MAP kompaniyasına “faizsiz kredit” verib",- məlumatda deyilir.

Həmçinin bildirilir ki, Arutyunyan öz səlahiyyətlərindən sui-istifadə edərək "Ani" MMC-yə məxsus "Jradzor" SES-dəki sudan gündəlik olaraq istifadəyə icazə verib.

İstintaqın məlumatına görə, təqsirləndirilən şəxslərdən Qaqik Karapetyan 2018-ci ilin oktyabr-noyabr aylarında qeyri-qanuni olaraq Ermənistan sərhədini keçərək Gürcüstandan Rusiyaya, oradan da Türkiyə və ABŞ-a gedib.
Aram Arutyunyan, Qaqik Karapetyan və Suren Avaqyan isə "qiyabi" şəkildə həbs edilib, onların 30 milyon dollarlıq əmlakına həbs qoyulub.

Qalan təqsirləndirilən şəxslər üçün istintaq 2019-cu ildə tamamlanıb. Prosesdən ayrılan işin bir hissəsi hazırda məhkəmədədir.

Tural Tağıyev
AzVision.az

Teqlər: Nazir Rüşvət Məhkəmə Ermənistan