"ABŞ Rusiyanın fundamental narahatlığına məhəl qoymadı" - Putin

"ABŞ Rusiyanın fundamental narahatlığına məhəl qoymadı" - Putin
  01 Fevral 2022    Oxunub:914
"ABŞ-ın təhlükəsizlik zəmanətlərinə cavabından artıq aydın olur ki, Amerika tərəfi Rusiyanın fundamental narahatlığına məhəl qoymayıb". AzVision.az xəbər verir ki, bunu Rusiya Prezidenti Vladimir Putin Macarıstanın baş naziri Viktor Orbanla apardığı danışıqlardan sonra keçirilən mətbuat konfransında deyib.
O qeyd edib ki, Moskva yanvarın 26-da ABŞ və NATO-dan təhlükəsizlik zəmanəti ilə bağlı təkliflərə verilən cavabları diqqətlə təhlil edir.

Blinken Lavrova "Dialoqları davam etdirməyə hazırıq!" dedi
- Ancaq artıq aydın oldu ki, və mən bu barədə Baş nazirə məlumat verdim ki, Rusiyanın fundamental narahatlığına məhəl qoyulmayıb. Biz üç əsas tələbimizə adekvat baxılmasını görmədik, - Rusiya Prezidenti narazılığını ifadə edib.

Rusiya prezidenti əsas məqamlar arasında NATO-nun genişlənməsinin qarşısının alınması, Rusiya sərhədləri yaxınlığında zərbə silah sistemlərinin yerləşdirilməsindən imtina, eləcə də blokun Avropadakı hərbi infrastrukturunun 1997-ci il vəziyyətinə qaytarılmasını qeyd edib.

Qeyd edək ki, son aylar Rusiya ilə Qərb ölkələri arasında gərginlik yaranıb. Bu beynəlxalq siyasi böhran Ukraynaya görə meydana gəlib. NATO və ABŞ rəsmiləri Rusiyanın Ukrayna ilə sərhədə 100 mindən çox qoşun toplamasını Moskvanın qonşusunu işğala hazırlaşması ilə əlaqələndirib. Rusiya rəsmiləri isə silahlı qüvvələrini öz ərazisində yerdəyişmə etmək üçün suveren hüquqa malik olduğunu bəyan edərək bu cür hərbi gedişlərin, heç kimi təhdid etmədiyini söyləyirlər.

ABŞ və bəzi Avropa ölkələri Ukraynada yeni münaqişənin başlanacağı təqdirdə Rusiyanı “görünməmiş sanksiyalarla” hədələyir. Bunun fonunda Şimali Atlantika Alyansı da Şərqi Avropada mövcudluğunu gücləndirir.

Tural Tağıyev
AzVision.az



Teqlər:   ABŞ   Rusiya   NATO   Putin  





Xəbər lenti


Azvision.az ©2014 | Bütün hüquqları qorunur