Agent erməni hərbçi saxlanılıb - VİDEO

//Hind silahlarıyla bağlı məlumat toplayırmış

Agent erməni hərbçi saxlanılıb -   VİDEO
  31 Yanvar 2023    Oxunub:2075
Ermənistan ordusunda növbəti dəfə xəyanət faktı aşkarlanıb. AzVision.az xəbər verir ki, bu barədə Milli Təhlükəsizlik Xidməti (MTX) məlumat yayıb.
Qeyd edilir ki, MTX əməkdaşları pul müqabilində hərbi sirləri xarici xüsusi xidmət orqanına ötürən hərbçinin cinayət əməllərinin üstünü açıblar.

200 dollara casusluq edən erməni hərbçi saxlanıldı - VİDEO
"Hərbi hissələrdən birində kapitan rütbəsi ilə xidmətdə olan Ermənistan vətəndaşı 2021-ci ilin əvvəlində xarici kəşfiyyat xidmətlərinin diqqət mərkəzinə düşüb. Beləcə kapitan kəşfiyyat tərəfindən ələ alınıb. Zabit başqa hərbi hissəyə keçdikdən sonra Ermənistanın suverenliyi, ərazi bütövlüyü və təhlükəsizliyinə qarşı istifadə oluna biləcək məxfi məlumatları pul müqabilində toplayaraq xarici kəşfiyyat nümayəndələrinə ötürməyi öhdəsinə götürüb", - MTX-nin məlumatında deyilir.



Hələlik adı açıqlanmayan hərbçi 2021-ci ilin aprelindən may ayına qədər müxtəlif telefon proqramlarından istifadə edərək məlumatlar toplayıb və işlədiyi adamlara göndərib.

Xüsusilə, o, silah növləri, onların miqdarı, Hindistandan alınan texnikalar, döyüş mövqelərindəki dislokasiyalar haqqında məlumatları ötürüb. Zabitə qarşı cinayət işi açılıb və o həbs edilib.

Xatırladaq ki, MTX son iki ildə bir neçə dəfə dövlətə xəyanət faktını aşkarlayıb. 44 günlük müharibədən sonra Ermənistanda xəyanət ittihamı ilə saxlanılan xeyli sayda hərbçi olub ki, onlar həm döyüşlər vaxtı, həm də müharibədən sonra xarici xüsusi xidmət orqanlarına işləyirlərmiş.
Tural Tağıyev
AzVision.az



Teqlər:   Ermənistan   Ordu   Xəyanət   Kəşfiyyat  





Xəbər lenti