Bu fikirlər “Economic Times” qəzetində dərc olunan məqalədəndir.

Nəşr öz mənbələrinə istinadən yazır ki, "Çatdırılmalar iki ölkə arasında 2022-ci ilin sentyabrında imzalanmış müqavilələr əsasında həyata keçiriləcək. Müqavilələrin dəyəri 20 milyard rupi (244,7 milyon dollar-red.) təşkil edir. Bu sənədlərə əsasən, Hindistan əvvəllər Ermənistanı "Pinaka" reaktiv yaylım atəşi sistemləri ilə təmin edib. Hansılar ki, ilk dəfə xaricə satılıb. Həmçinin tank əleyhinə raketlər və sursatlar da bura daxildir.

Hindistan Ermənistana raket ixracına başladı - FOTOLAR

Məqalədə qeyd edilir ki, silahlar İran ərazisindən keçən nəqliyyat dəhlizi vasitəsilə çatdırılıb. Bundan başqa, müəllif Ermənistanı Hindistanın Qafqazda strateji müttəfiqi kimi təqdim edib.

Yazıda bu yaxınlarda Ermənistanın yüksək rütbəli rəsmilərindən birinin Dehlidə səfərdə olması və silah müzakirələri aparması da xatırladılıb. İrəvan rəsmiləri qeyd edirlər ki, Hindistan Ermənistanın tələblərinə uyğun olan etibarlı silah tədarükçüsünə çevrilib.

"Adının açıqlanmasını istəməyən Ermənistandakı mənbələr yeni göndəriləcək yüklərin təfərrüatlarının hələlik məlum olmadığını deyirlər. Lakin hərbi daşımalarda Azərbaycanla davam edən münaqişə vəziyyətində çəkindirmə yaratmağa kömək edəcək avadanlıqlar ola bilər", - nəşr yazıb.

“Indian Defence Research Wing” saytı ötən ay avqustun əvvəlində Hindistanın “Bharat Forge LTD” müdafiə şirkətinin 155,5 milyon dollarlıq müqavilə çərçivəsində altı yedəkli 155 mm-lik ATAGS haubitsasını Ermənistana təhvil verdiyini yazmışdı.

Müqaviləyə əsasən üç il ərzində Ermənistana sözügedən 90 artilleriya qurğusunun çatdırılması nəzərdə tutulur.

“Economic Times”ın haqqında söz açdığı "Pinaka"lar isə əslində ideal yaylım atəşli reaktiv sistem (YARS) sayılmır. Sadəcə bu raket sistemi iqtisadi cəhətdən səmərəlidir ki, bu da onun keyfiyyətinin yüksək olmamasından xəbər verir. İrəvan silahı guya istifadəsi asan olması və Rusiya istehsalı olan QRAD sisteminə bənzədiyi üçün aldığını deyir.

Qeyd edək ki, İkinci Qarabağ müharibəsindən sonra Hindistan Ermənistanla hərbi sahədə fəal əməkdaşlıq kursu götürüb. Ötən ilin sentyabrında iki ölkə arasında imzalanan hərbi müqavilələrə görə Hindistan Ermənistana 250 milyon dollar dəyərində tank əleyhinə raketlər və bir sıra digər hərbi sursat tədarük etdi. Həmçinin Hindistan mediası ölkənin özəl şirkəti “Kalyani Strategic Systems Ltd”nin (Bharat Forge) 155 mm-lik yedəkli haubitsaların (ATAGS) tədarükü üçün ilk ixrac sifarişini aldığını xəbər vermişdi.

“Pinaka” - 40 km mənzilə malik yaylım atəşli reaktiv sistemdir (YARS). Artilleriya hissə və bölməri tərəfindən istifadə olunur. Bir atıcı qurğu üzərində mövcud olan 12 ədəd boruşəkilli istiqamətləndiricinin buraxdığı yaylım atəşi 1 kv.km-ə qədər ərazidə yerləşən hədəflərə zərər vura bilər.

YARS - uzaq məsafələrdə, düşmənin açıqda və sığınacaqda yerləşən canlı qüvvəsindən, zirehsiz və zirehli texnikalarından, artilleriya qurğularından, taktiki raketlərindən, zenit-raket sistemlərindən ibarət olan qrup hədəflərini məhv etmək, komanda məntəqələrini, rabitə mərkəzlərini və hərbi-sənaye obyektlərini dağıtmaq, həmçinin dağlıq ərazilərin uzaq məsafədən piyada və tank əleyhinə minalanması üçün nəzərdə tutulur.

Hazırlanması və istehsalı

“Pinaka” sistemi Hindistanın Silah Tədqiqat və İnkişaf Mərkəzi olan DRDO tərəfindən 1986-cı ildə hazırlanıb. 1998-ci ildən bugünə qədər “Tata Group” ilə “Larsen & Toubro” şirkətləri tərəfindən birgə istehsal edilir. Bir batareya dəstinin dəyəri təxminən 54 milyon ABŞ dollarıdır. Batareya dəstinə 6 atıcı qurğu, 6 yükləmə maşını, 3 daşıma maşını, 2 komanda məntəqəsi və 1 radiolokasiya stansiyası daxildir. Böyük ehtimalla Ermənistan bu sistemin 4 batareya dəstini əldə etməklə bir reaktiv artilleriya divizionu formalaşdırmaq niyyətindədir. Yerdə qalan 28 milyon dollara tank əleyhinə vasitələr və təlim trenajorları daxil ola bilər.
Tural Tağıyev
AzVision.az