Məmmədyarov BMT-nin Ali nümayəndəsi ilə görüşüb

  03 May 2019    Oxunub : 682
Məmmədyarov BMT-nin Ali nümayəndəsi ilə görüşüb
Xarici işlər naziri Elmar Məmmədyarov V Ümumdünya Mədəniyyətlərarası Dialoq Forumu çərçivəsində BMT-nin Sivilizasiyalar Alyansı üzrə Ali nümayəndəsi Migel Anxel Moratinos ilə görüşüb.
Nazirlikdən Azvision.az -a verilən məlumata görə, M.A.Moratinos Azərbaycan Respublikasının Prezidenti İlham Əliyev tərəfindən qəbul olunduğundan və tədbirin yüksək səviyyədə təşkilindən məmnunluğunu ifadə edib. Ali nümayəndə Azərbaycan ilə Alyans arasında qarşılıqlı faydalı əməkdaşlığın olduğunu diqqətə çatdırıb.

M.A.Moratinos 120 ölkəni özündə birləşdirən təşkilatın terrorizmə qarşı mübarizə və cəmiyyətlərin bu kimi təhdidlərdən qorunması sahəsində fəaliyyətinin gücləndirilməsi niyyəti barədə məlumat verib.

E.Məmmədyarov təşkilat ilə Azərbaycan arasındakı əməkdaşlıq əlaqələrinin cari vəziyyətini yüksək qiymətləndirib və Alyansın müasir dövrün çağırışlarına qarşı mübarizədə fəal rol oynamasının zəruriliyini vurğulayıb. Forum çərçivəsində “BMT sistemində sülh naminə çoxtərəflilik və diplomatiyanın gücləndirilməsi” mövzusunda paneldə çıxışına istinad edən nazir E.Məmmədyarov multikulturalizmə müasir dünyamızda böyük ehtiyac duyulduğunu diqqətə çatdırıb.

Görüş zamanı tərəflər qarşılıqlı maraq doğuran məsələlər barəsində fikir mübadiləsi aparıblar.

Azvision.az

Teqlər: XİN