Məcburi köçkünlərə hüquqi yardım göstərilib

Məcburi köçkünlərə hüquqi yardım göstərilib
  09 Dekabr 2019    Oxunub:1884
Azərbaycan Respublikasının Vəkillər Kollegiyası Prezident İlham Əliyevin ötən il fevralın 22-də imzaladığı “Azərbaycan Respublikasında vəkilliyin inkişafı ilə bağlı əlavə tədbirlər haqqında” Sərəncama əsasən, hüquqi məsləhətə ehtiyacı olan aztəminatlı şəxslərə ödənişsiz hüquqi xidmətlərin göstərilməsini davam etdirir.
Vəkillər Kollegiyasından Azvision.az -a verilən məlumata görə, respublikanın müxtəlif regionlarında hüquqi yardıma ehtiyacı olan şəxslərə mütəmadi qaydada pulsuz hüquqi yardım göstərilməsi üzrə tədbirlər keçirilir.

Ölkə əhalisinin həssas təbəqələrindən olan qaçqın və məcburi köçkün soydaşlarımızın problemlərinin həlli, onların sosial müdafiəsinin gücləndirilməsi daim Azərbaycan dövlətinin diqqət mərkəzindədir. Bu baxımdan Azərbaycan Respublikası Vəkillər Kollegiyası pulsuz hüquqi yardım və hüquqi maarifləndirmə ilə bağlı növbəti tədbirini məcburi köçkünlərin yığcam məskunlaşdıqları “Qobu Park-2” yaşayış kompleksində təşkil edib.

Tədbir çərçivəsində Bakı şəhəri 20 saylı vəkil bürosunun üzvləri 100-ə yaxın məcburi köçkün ailəsinə pulsuz hüquqi yardım göstərib. Tədbirdə vətəndaşların müraciətlərinə baxılması qaydaları, pensiya təminatı məsələləri, məcburi köçkünlərin imtiyazları, sahibkarlıq fəaliyyəti, məhkəmə-hüquq islahatları ilə bağlı hüquqi maarifləndirmə işi həyata keçirilib.

Azərbaycan Respublikasının Vəkillər Kollegiyası bu cür tədbirləri qaçqın və məcburi köçkünlərin məskunlaşdıqları digər regionlarda da təşkil etməyi planlaşdırır.

Xatırladaq ki, dövlətimizin başçısının Sərəncamında, Vəkillər Kollegiyasına hüquqi məsləhətə ehtiyacı olan aztəminatlı şəxslər üçün pulsuz hüquqi xidmətlərin göstərilməsi tövsiyə edilib.

Azvision.az


Teqlər: Vəkil  





Xəbər lenti