"Fransız xalqının maraqları ermənilərin girovuna çevrilməməlidir"

  17 Noyabr 2020    Oxunub : 1491
"Fransız xalqının maraqları ermənilərin girovuna çevrilməməlidir"
“Paris meriyasının artıq mövcud olamayan hansısa Dağlıq Qarabağ adlı nəyi isə tanımaq həvəsinə düşməsi gecikmiş və puc olmuş siyasi romantizmdən başqa bir şey deyil”.
Bunu Azvision.az -a açıqlamasında Milli Məclisin deputatı Hikmət Babaoğlu bildirib.

“Görünür kimlərəsə yeni avtoritar populizm lazımdır və konkret halda Fransa paytaxtının meri Ann İdalqo bununla məşğuldur. Əslində onu bu cür qeyri qanuni addımlara təşviq edən də erməni lobbisi və Fransada olan ermənipərəstlərdir. Biz bilirik ki, Paris Şurası 163 nəfərdən ibarətdir şura şəhər merini və onun 40 müavinini seçir. Hazırda isə Fransa prezidenti E.Makronun yaratdığı və rəhbərlik etditi “İrəli Fransa” partiyası Şurada geniş şəkildə təmsil olunur. Ona görə də belə düşünməyə əsasımız var ki, bu məsələ sadəcə Paris meriyasının deyil, həm də sentyabr ayının 27-dən bəri Azəbaycanın beynəlxalq hüquqa söykənən haqq işinə qarşı təxribatçı fikirlər səsləndirən bəzi fransız rəsmilərin də təşəbbüsüdür”, - deputat qeyd edib.

Deputat mer Ann İdalqonun Fransa erməniləri ilə sıx əlaqələrindən söz açaraq deyib ki, hətta onun müavinlərindən biri erməni əsilli Anuş Toronyandır:

“Anuş Toronyan isə Fransız ermənilərinin təşkilatı CCAF-ın rəhbəri Ara Toronyanın qızıdır. Bu fakt özlüyündə Paris meriyasının atmaq istədiyi qeyri- qanuni addımın kökündə nələrin dayandığını yaxşı izah edir. Ancaq bu da məsələnin hamısı deyil. Hələ 2015-2018-ci illərdə Parisin meri Anna İdalqo Ermənistan prezidenti Serj Sarqsyanla 4 dəfə görüşüb. Ann İdalqo Ermənistanda yaradılmış TUMO Center for Creative Technologies mərkəzinin Paris bölməsinin açılışında iştirak edib və hərtərəfli dəstək göstərib. TUMO-nun Xankəndidə də ofisi olub.Bütün bunlar erməni lobbisinin davamlı səyləri nəticəsində baş tutub. Ona görə də Paris merisyası hazırda belə spekuliyativ hərəkətlər edir. Ancaq Paris kimi böyük bir şəhər meriyasının maraqları, ya da elə fransız xalqının maraqları bir qrup erməninin girovuna çevirilə bilməz, çevirilməməlidir. Bu təşəbbüsə dəstək verənlər sonda ya peşiman olmağa ya da geriya addım atmağa məhkumdurlar”.

Tural Tağıyev
Azvision.az

Teqlər: Paris   Fransa