Dünya Bankı ilə ədliyyə sahəsində əməkdaşlıq müzakirə edilib

  04 İyun 2019    Oxunub : 711
Dünya Bankı ilə ədliyyə sahəsində əməkdaşlıq müzakirə edilib
Dünya Bankının təşkilatçılığı ilə Bakıda keçirilən “Azərbaycanda ədliyyə sektorunun nailiyyətləri: keçmişə və gələcəyə baxış” mövzusunda forumda iştirak etmək üçün ölkəmizdə səfərdə olan Dünya Bankının Cənubi Qafqaz üzrə regional direktoru xanım Mersi Tembonun başçılıq etdiyi nümayəndə heyəti ilə iyunun 4-də Ədliyyə naziri Fikrət Məmmədovun görüşü keçirilib.
Ədliyyə Nazirliyindən Azvision.az -a verilən məlumata görə, Azərbaycan ilə Dünya Bankı arasında səmərəli əməkdaşlığın vurğulandığı görüşdə forumun ədliyyə sahəsində birgə həyata keçirilən layihələr nəticəsində əldə olunan nailiyyətlərin geniş auditoriyaya, o cümlədən beynəlxalq aləmə təqdim edilməsində mühüm əhəmiyyəti diqqətə çatdırılıb.

Nazir Azərbaycan Prezidenti İlham Əliyevin rəhbərliyi ilə məhkəmə-hüquq sisteminin müasirləşdirilməsi üzrə reallaşdırılan islahatlarda Dünya Bankının dəstəyini vurğulayıb, dövlətimizin başçısının ədliyyə və məhkəmə sisteminin inkişafında mühüm “yol xəritəsi” olan “Məhkəmə-hüquq sistemində islahatların dərinləşdirilməsi” haqqında 2019-cu il 3 aprel tarixli Fərmanının icrasının əməkdaşlığın genişləndirilməsi üçün yeni imkanlar açdığını və qarşıda duran vəzifələrin yerinə yetirilməsində, xüsusilə “Elektron məhkəmə” informasiya sisteminin tam tətbiqində Dünya Bankının iştirakının əhəmiyyətini qeyd edib.

Dünya Bankının Azərbaycanla əlaqələrinin çox uğurlu olduğunu söyləyən xanım M.Tembon ölkəmizin nümunəvi tərəqqisini qeyd edib, məhkəmə-hüquq islahatlarının davam etdirilməsində Azərbaycan Prezidentinin siyasi iradəsini vurğulayaraq birgə həyata keçirilən layihələr nəticəsində əldə olunan nailiyyətləri, o cümlədən ədalət mühakiməsinin səmərəliliyinin xeyli artmasını, elektron məhkəmənin tətbiqini alqışlayıb. Qeyd edib ki, Bankın ədliyyə sahəsindəki layihələri dünyada model layihə kimi qiymətləndirilərək digər dövlətlər üçün nümunəyə çevrilib. Həmin layihələr apreldə Vaşinqtonda keçirilən təqdimat zamanı çox böyük təəssüratla qarşılanaraq Azərbaycan nailiyyətlərinin təqdirəlayiq olduğu vurğulanıb. Ölkəmizin müsbət təcrübəsindən yararlanmaq üçün digər dövlətlər tərəfindən Dünya Bankına müraciətlər edilir.

M.Tembon Azərbaycanda fəaliyyət müddətinin başa çatdığını bildirərək Bankın yeni regional direktoru Sebastian Molenösü təqdim edib.

Nazir M.Tembona səmərəli əməkdaşlığa görə minnətdarlığını ifadə edib, S.Molenösə uğurlu fəaliyyət arzulayıb.

S.Molenös birgə layihələrin uğurlu nəticələrinin şahidi olduğunu bildirərək, Dünya Bankının məhkəmə-hüquq islahatlarına dəstək göstərməyə hazır olduğunu və səmərəli əlaqələrin bundan sonra da inkişaf etdirilməsi üçün səylərini əsirgəməyəcəyini vurğulayıb.

Azvision.az

Teqlər: Ədliyyə-Nazirliyi   Dünya-Bankı