Konstitusiya Məhkəməsinin mətbuat xidmətindən AzVision.az -a bildirilib ki, tədbirin əvvəlində Konstitusiya Məhkəməsinin sədri Fərhad Abdullayev müasir Azərbaycan dövlətinin qurucusu, dünyaşöhrətli siyasi xadim Heydər Əliyevin mənalı ömür yolu və demokratik-hüquqi dövlət quruculuğu fəaliyyətindən, xalqımız və dövlətimiz qarşısındakı misilsiz xidmətlərindən, xilaskarlıq missiyasından, respublikamızın hərtərəfli inkişafı naminə atdığı addımlardan, müdrik və uzaqgörən siyasətindən bəhs edib.

Qeyd edilib ki, Ümummilli Lider Heydər Əliyev daim Azərbaycan xalqının rifahını düşünərək qəlblərdə sonsuz sevgi, yaddaşlarda əbədiyaşarlıq qazanıb. Müstəqilliyimiz məhz Ulu Öndərin yenidən hakimiyyətə qayıtması nəticəsində əbədi və dönməz xarakter alıb. Vətəninə, xalqına hədsiz məhəbbət ilə bağlı olan və bütün mənalı ömrünü dövlətinə xidmətə həsr edən Ulu Öndərin gördüyü işlərin böyüklüyü zaman keçdikcə daha da dərindən dərk edilir və hər bir azərbaycanlı dahi Heydər Əliyevin şəxsiyyətinə, onun qoyduğu dəyərli irsə böyük hörmət və ehtiram hissi ilə yanaşır.



Vurğulanıb ki, Azərbaycan xalqının ictimai-siyasi həyatında mühüm rol oynamış Ulu Öndər dövlətçilik ənənələrinin yaradılmasında əvəzsiz xidmətlər göstərib və bununla da adını qızıl hərflərlə Azərbaycan tarixinə yazıb. Ümummilli Lider Heydər Əliyevin 100 illik yubileyi ərəfəsində onun Azərbaycan xalqı və dövləti qarşısındakı xidmətləri dərin ehtiram ilə ölkəmizin hər yerində, eyni zamanda onun hüdudlarından kənarda geniş şəkildə qeyd edilir. Müstəqil Azərbaycan dövlətinin memarı Heydər Əliyevin həyat və fəaliyyətinin öyrənilməsi baxımından belə tədbirlərin keçirilməsi mühüm əhəmiyyət kəsb edir.

Bildirilib ki, Ulu Öndər Heydər Əliyevin anadan olmasının 100 illiyi ilə bağlı Konstitusiya Məhkəməsi də, öz növbəsində silsilə tədbirlər həyata keçirib, o cümlədən Konstitusiya Məhkəməsinin hakimləri və Aparatın əməkdaşlarının Ulu Öndərin çoxşaxəli fəaliyyətinə həsr edilmiş bir sıra məqalələri müxtəlif mətbuat orqanlarında dərc olunub.



Sədr qeyd edib ki, bu gün Ümummilli Lider Heydər Əliyevin hüquqi və demokratik dövlət quruculuğu xətti yeni dövrün tələblərinə uyğun olaraq dövlətimizin başçısı İlham Əliyev tərəfindən uğurla davam etdirilir. Ulu Öndər Heydər Əliyevin ideyaları əsasında sürətlə inkişaf edən dövlətimiz Azərbaycan Respublikasının Prezidenti İlham Əliyevin rəhbərliyi ilə olduqca qüdrətli dövrünü yaşayır və torpaqlarımızın işğaldan azad edilməsi, ərazi bütövlüyümüzün bərpası müstəqil dövlətçiliyimizin ən mühüm və əlamətdar hadisəsi kimi tarixə yazılıb. 44 gün davam edən Vətən müharibəsi Azərbaycan xalqının qürur mənbəyinə çevrildi, qazanılan tarixi Zəfər milli şüurun, xalq və ordu birliyinin təcəssümü oldu.

Qazanılan şanlı Qələbə nəticəsində dövlətimizin Əsas Qanununun hüquqi qüvvəsi işğaldan azad edilmiş torpaqlarımızda bərpa olundu, eyni zamanda vətəndaşlarımızın bir sıra konstitusiya hüquqlarının bərpası üçün zəmin yarandı.



Sonda vurğulanıb ki, bu gün Azərbaycan qlobal proseslərin fəal iştirakçısı olaraq dünya birliyinin bərabərhüquqlu üzvü, söz sahibi olan bir dövlətdir və bu cür yüksək nailiyyətlərin əldə edilməsi üçün dövlətimizin başçısı İlham Əliyevin şəxsi nüfuzu, qətiyyəti, siyasi iradəsi, uğurlu daxili və xarici siyasəti sayəsində çox böyük və ciddi işlər görülüb və görülməkdədir. Prezident İlham Əliyevin rəhbərliyi ilə Azərbaycan dövləti və xalqı tarixi nailiyyətlərə imza atmaqda bundan sonra da davam edəcək. Azərbaycan Respublikasının Konstitusiya Məhkəməsi də, öz növbəsində müəllifi Ulu Öndər Heydər Əliyev olan Əsas Qanunun aliliyinin, insan hüquq və azadlıqlarının, habelə ədalət ideallarının müdafiəsi işinə bundan sonra da öz töhfəsini verməkdə davam edəcək.

Daha sonra Konstitusiya Məhkəməsinin kollektivi görkəmli şəxsiyyət Heydər Əliyevin həyatını və zəngin fəaliyyətinin ayrı-ayrı dövrlərini əks etdirən AZƏRTAC-ın arxivindən fotoşəkillər ilə tanış olublar.

AzVision.az