AzVision.az xəbər verir ki, tədbiri açan Rusiya Televiziya Akademiyası Fondunun baş direktoru Etere Leviyeva festivalın iştirakçı ölkələrin xalqları arasında dostluq münasibətlərini daha da möhkəmləndirəcəyinə əminliyini ifadə edib. E.Leviyeva bildirib ki, festivalda MDB-nin 11 ölkəsinin televiziya kanallarından tanınmış rejissorlar, aparıcılar və mütəxəssislər iştirak edirlər. O, festivalın təşkil olunmasında dəstəyə görə Azərbaycan Respublikası Prezidenti Administrasiyasına və “Azərbaycan Televiziya və Radio Verilişləri” QSC-yə təşəkkür edib.

Prezident Administrasiyasının ictimai-siyasi məsələlər şöbəsinin müdir müavini Ərəstun Mehdiyev mərasimdə çıxış edərək festivalın Bakıda keçirilməsini yüksək qiymətləndirib. Ərəstun Mehdiyev festivalın şəhərimizin mədəni həyatında vacib hadisə olduğunu bildirib və Azərbaycanın regionda böyük mədəniyyət tədbirlərinə ev sahibliyi etdiyini vurğulayıb.

Festivalın ölkələrimiz arasında sıx dostluq əlaqələrinin bariz nümunəsi olduğunu deyən Prezident Administrasiyasının rəsmisi bunun eyni zamanda iştirakçıların Azərbaycanla daha yaxından tanış olmaları, təcrübə mübadiləsi baxımından yaxşı fürsət yaratdığını qeyd edib.
“Azərbaycan Televiziya və Radio Verilişləri” QSC-nin sədr müavini Faiq Hüsüyev bu festivalın televiziya kanalları arasında əməkdaşlığın inkişafı üçün əhəmiyyətli olduğunu söyləyib. O, Azərbaycanın Rusiya ilə səmimi dostluq əlaqələrini də qeyd edib.

Əslən Bakıdan olan məşhur kinorejissor Yuli Qusman dünyada Azərbaycan qədər ikinci qonaqpərvər ölkə görmədiyini deyib və festival iştirakçılarının şəhərimizdə çox səmimi münasibətin şahidi olacaqlarını bildirib.

MDB ölkələri televiziyalarının işlərinin təqdimatı məqsədilə keçirilən bu festivalda bir çox telefilmlərə baxış olacaq. Artıq ilk olaraq “Azərbaycan Televiziya və Radio Verilişləri” QSC tərəfindən çəkilən “Heydər Əliyev fondu 10 il” filmi təqdim olunub. Bundan əlavə, festival çərçivəsində Belarus, Gürcüstan, Qazaxıstan, Ukrayna, Moldova və digər ölkələrin televiziya filmlərinə də baxış keçiriləcək.