81 dövlət əmlakı hərraca çıxarılıb

81 dövlət əmlakı hərraca çıxarılıb
  25 Yanvar 2017    Oxunub:1493
Əmlak Məsələləri Dövlət Komitəsi tərəfindən yanvarın 31-də dövlət əmlakının özəlləşdirilməsi üzrə hərrac keçiriləcək. Hərraca 20 səhmdar cəmiyyətin səhmləri, 23 nəqliyyat vasitəsi və 38 kiçik dövlət müəssisə və obyekti çıxarılıb. Hərrac paytaxt (Komitənin İnformasiya Texnologiyaları Mərkəzi, Heydər Əliyev prospekti, 139A) və regionlardakı hərrac mərkəzlərində təşkil olunacaq.
Komitədən AzVision.az -a bildirilib ki, açıq və şəffaf keçirilən hərraca istənilən şəxs izləyici və ya sifariş verərək iştirakçı qismində qatıla bilər. Eyni zamanda, canlı bağlantı ilə regionlarda keçirilən hərraclar da monitorlarda izlənilir.

Qeyd edək ki, hərrac elanları komitənin bütün informasiya resurslarında və KİV-də açıqlanır. Hərracdan 1 ay əvvəl özəlləşməyə çıxarılan əmlaklar barədə komitənin “privatization.az” portalında ətraflı məlumatlar verilir. Məsələn, portalda hərraca çıxarılan kiçik dövlət müəssisəsinin adı, ünvanı, tikili və torpaq sahəsi, işçilərin sayı, ilkin satış qiyməti və 10 faiz beh məbləği, fotosu və yerləşdiyi yeri göstərən xəritəsi əks olunur. Səhmdar cəmiyyətinin adı, təsis tarixi, ünvanı, nizamnamə kapitalının həcmi, bir səhmin nominal qiyməti, satışa çıxarılan səhm sayı, ilkin satış qiyməti və 10 faiz beh məbləği, eləcə də fotolar və xəritə göstərilir. Eləcə də nəqliyyat vasitəsinin balanssaxlayıcısı, markası, buraxılış ili, yürüş məsafəsi, start qiyməti və fotoları ilə tanış olmaq mümkündür.

Paytaxtın Suraxanı rayonunda yerləşən 47 saylı mağaza 200 min manata, Sumqayıtda yerləşən 3 saylı avtomobillərə qazdoldurma stansiyası 280 min manata, Şirvan şəhərindəki Yardımçı təsərrüfat isə 315 min manata təklif olunur. Özəlləşməyə çıxarılan paytaxtdakı qeyri-yaşayış sahələri Səbail, Nəsimi, Yasamal, Binəqədi, Nizami, Nərimanov və Xətai rayonlarında yerləşir. Binəqədi rayonundakı qeyri-yaşayış obyektinə 468 min 400 manat, Səbail rayonundakı obyektə isə 460 min manat ilkin satış qiyməti təyin olunub. Paytaxtdakı əmlakların sahəsi əsasən 15-300 kvadratmetr arasında dəyişir.

Özəlləşməyə çıxarılan səhmdar cəmiyyətləri təmir-tikinti, sənaye, aqrar, nəqliyyat, inşaat, istehsal və digər sahələrə aiddir. Müxtəlif şəhər və rayonlarda yerləşən belə iri müəssisələr sırasında paytaxtda yerləşən “Sabunçu Ticarət Təchizat”, “Xətai Ticarət-108” ilə yanaşı, regionlarda yerləşən “Ağcabədi Aqrotexservis”, “Mingəçevir Qum Çınqıl”, “Tovuz Məişət”, “Ucar İnşaat Xidmət”, “Xırdalan yük nəqliyyat” kimi səhmdar cəmiyyətlər var.

Sifariş komitənin Özəlləşdirmə portalı üzərindən verilir. Elektron sifarişlər hərracın keçirilməsinə 3 bank günü qalanadək qəbul edilir. Elektron sifariş verildikdən sonra əmlakın ilkin satış qiymətinin 10 faiz məbləğində behi elektron qaydada ödənilir. Bu prosedurdan sonra vətəndaş hərracda iştirak etmək statusu qazanır. Hərracda qalib olmayan şəxsin ödədiyi beh 10 gün ərzində geri qaytarılır. Hərrac prosedurları barədə ətraflı məlumatı komitənin (012) 566 07 44 nömrəli çağrı mərkəzindən almaq olar.

AzVision.az


Teqlər:





Xəbər lenti