Hərbi Prokurorluğun mətbuat xidmətindən Azvision.az -a verilən məlumata görə, ulu öndər Heydər Əliyev Ordunun xalqımızın tərkib hissəsi olduğunu vurğulamaqla dövlətin, xalqın qayğısı ilə əhatə olunmasını, hər kəsin Orduya qayğı göstərməsini tövsiyə edib. Azərbaycan Respublikasının Prezidenti İlham Əliyevin müntəzəm olaraq cəbhə bölgələrinə səfərlər edərək əsgər və zabitlərlə görüşlər keçirməsi, xidmətdə fərqlənən hərbi qulluqçulara Vətənin mükafatlarını təqdim etməsi Silahlı Qüvvələrimizin şəxsi heyətində böyük ruh yüksəkliyi yaradır, onları mətin mübarizəyə ruhlandırır.

Azərbaycan Ordusunda və başqa silahlı birləşmələrdə qanunvericiliyin tələblərinə tam və dönmədən əməl olunmasını, qanunçuluğun və hüquq qaydasının möhkəmləndirilməsini, eləcə də insan hüquq və azadlıqlarının daha etibarlı müdafiəsini təmin etmək məqsədilə Hərbi Prokurorluğun Müdafiə Nazirliyi, Dövlət Sərhəd Xidməti, Daxili İşlər Nazirliyinin Daxili Qoşunları və digər hərbi qurumlarla birgə hazırladığı “Hüquq qaydalarının və hərbi intizamın möhkəmləndirilməsinə dair”, “Cinayətkarlığa qarşı mübarizəyə dair”, “Cinayət hadisələrinin qarşısının alınmasına dair”, “Hərbi qulluqçularda vətənpərvərlik hisslərinin gücləndirilməsinə dair” və sair mövzular üzrə tədbirlər planları əsasında Hərbi Prokurorluğun yüksək vəzifəli işçiləri həmin qurumların rəhbər vəzifəli əməkdaşları ilə birgə mütəmadi olaraq səmərəli işlər görür, o cümlədən tədbirlər təşkil edirlər. Həmin tədbirlərdə hərbi qulluqçuların qayğı və problemləri ilə maraqlanılır, onların fərdi qəbulları keçirilir.

Eyni zamanda, yaşayış məntəqələrindən uzaqda, xüsusilə düşmənlə təmas xəttində və çətin şəraitdə qulluq edən hərbi qulluqçuların vətənpərvərlik və döyüş ruhunu, əhval-ruhiyyəsini yüksəltmək, onların asudə vaxtlarının daha maraqlı keçirilməsini, cəmiyyət tərəfindən daim diqqət və qayğı ilə əhatə olunmalarını təmin etmək məqsədilə hər il olduğunu kimi, bu il də Novruz bayramı ərəfəsində Respublika Hərbi Prokurorluğunun təşəbbüsü və təşkilatçılığı ilə Müdafiə Nazirliyi, Dövlət Sərhəd Xidməti, DİN-in Daxili Qoşunları ilə birgə tədbirlər planları hazırlanaraq təsdiq edilib. Həmin qurumların, eləcə də rayon icra hakimiyyətləri və Azərbaycan Vətən Müharibəsi Veteranları İctimai Birliyi ilə birgə hərbi birləşmələrdə, xüsusilə düşmənlə üzbəüz mövqelərdə dislokasiya olunmuş hərbi hissələrdə hüquqi təbliğat və mədəni-kütləvi xarakterli tədbirlər həyata keçirilib.

Bayram ərəfəsində qeyd edilən Tədbirlər planları Respublika Hərbi Prokurorluğu, Müdafiə Nazirliyi, Dövlət Sərhəd Xidməti, DİN-in Daxili Qoşunları, rayon (şəhər) icra hakimiyyətləri və Azərbaycan Vətən Müharibəsi Veteranları İctimai Birliyi tərəfindən martın 18-19-da tam şəkildə uğurla icra edilib. Müdafiə Nazirliyi üzrə 15, Dövlət Sərhəd Xidməti üzrə 5, DİN-in Daxili Qoşunları üzrə 4 hərbi hissədə tədbirlər keçirilib. Tədbirlər cəbhə boyu yerləşən bütün hərbi hissələri əhatə edib. Həmin tədbirlərdə, həmçinin Bakının Binəqədi, Xəzər rayonları, Gəncə, Sumqayıt, Lənkəran, Yevlax şəhərlərinin, eləcə də Ağcabədi, Ağdam, Füzuli, Xocavənd, Beyləqan, Göygöl, Daşkəsən, Tərtər, Tovuz, Goranboy, Gədəbəy, Qazax, Zaqatala və Qusar rayonlarının icra hakimiyyətlərinin nümayəndələri iştirak ediblər. Bundan başqa, tədbirlərin mədəni-kütləvi hissəsi - konsert proqramları, özfəliyyət kollektivlərinin şəxsi heyət qarşısında çıxışları yüksək səviyyədə təşkil olunub.

Tədbirlər zamanı Respublika Hərbi Prokurorluğunun yüksək vəzifəli işçiləri tərəfindən Prezidentimiz, Silahlı Qüvvələrin Ali Baş Komandanı İlham Əliyevin rəhbərliyi ilə ölkəmizdə uğurla həyata keçirilən möhtəşəm sosial-iqtisadi islahatlar nəticəsində əldə olunmuş sürətli inkişaf, Ordumuzun maddi-texniki bazasının gücləndirilməsi, onun müasir silahlarla təchizatı, hərbi qulluqçuların sosial vəziyyətinin, maddi rifah halının və təminatının davamlı olaraq yaxşılaşdırılması, korrupsiyaya qarşı mübarizə barədə şəxsi heyət qarşısında çıxışlar edilib.

Bununla yanaşı, həmin tədbirlər zamanı xidmətdə fərqlənən hərbi qulluqçuları mükafatlandırmaq, digər hərbi qulluqçuların da nümunəvi xidmətini stimullaşdırmaq məqsədilə Hərbi Prokurorluğun əməkdaşları tərəfindən 115 hərbçiyə qiymətli hədiyyələr təqdim olunub.

Azvision.az