Kanadada Xocalı lövhəsi qoyulub

  03 Fevral 2014    Oxunub : 494
Kanadada Xocalı lövhəsi qoyulub
Kanadanın Toronto şəhərində Azərbaycanın Kanadadakı səfirliyi və Kanada-Azərbaycan Tərəfdaşlıq Assosiasiyasının birgə təşkilatçılığı ilə Xocalı soyqırımının 22-ci ildönümünü münasibətilə xatirə lövhəsinin açılış mərasimi keçirilib.
Tədbirdə Toronto və Vaterlo universitetlərində təhsil alan azərbaycanlı tələbələr, eləcə də Torontoda yaşayan Azərbaycan icmasının üzvləri iştirak ediblər.

Tədbir zamanı ilk olaraq Torontonun mərkəzi parklarından biri olan "Harbour Square Park"da Xocalı soyqırımı qurbanlarının xatirəsinə əkilmiş ağacın ətrafında toplantı keçirilib. Həmin ağacın qarşısında bərkidilmiş memorial lövhədə "Xocalı faciəsinin xatirəsinə" sözləri həkk edilib. Toplantı zamanı çıxış edən Azərbaycanın Kanadadakı səfiri Fərid Şəfiyev ağacın Kanadada Xocalı soyqırımı qurbanlarının xatirəsinə həsr olunmuş ilk abidə olduğunu deyərək, bunu Xocalı həqiqətlərinin Kanadada yayılması baxımından mühüm hadisə kimi dəyərləndirib, eləcə də bu abidənin ərsəyə gəlməsində göstərdiyi əməyə görə Kanada-Azərbaycan Tərəfdaşlıq Assosiasiyasının sədri İlham Axundova dərin təşəkkürünü ifadə edib.

O, həmçinin Kanadada yaşayan icma üzvlərini Azərbaycan həqiqətlərinin Kanada ictimaiyyətinə çatdırılması və erməni yalanlarının ifşa edilərək, Ermənistanın Azərbaycana qarşı təcavüz siyasətinə son qoyulması istiqamətində səylərini səfərbər etməyə çağırıb. Səfir Xocalı hadisələrinin yad edilməsinin təkcə keçmiş deyil, həmin qırğınları törətmiş və bu gün Ermənistan rəhbərliyində təmsil olunan şəxslərin cinayət məsuliyyətinə cəlb edilməsi tələbi ilə bağlı olduğunu vurğulayıb.
Kanada-Azərbaycan Tərəfdaşlıq Assosiasiyasının sədri İ.Axundov da Xocalı soyqırımını yad edən abidənin Torontonun mərkəzi parklarından birində yaradılmasını böyük uğur kimi qiymətləndirib və bunu səfirlik və icmanın apardığı ardıcıl siyasətin nəticəsi olduğunu qeyd edib.

Teqlər: