AzVision.az-ın məlumatına görə, A.Məmmədxanov 2011-ci il aprelin 23-də ürək tutmasından dünyasını dəyişib.

Anar Məmmədxanov 1970-ci il iyulun 20-də Bakı şəhərində anadan olub. Bakı Dövlət Universitetinin mexanika-riyaziyyat fakültəsini bitirib. 1992, 1993, 1995-ci illərdə Şən və Hazırcavablar Klubları arasında MDB çempionu, 2000-ci ildə XX əsr çempionu olub. 1991-ci ildən Bakı Şən və Hazırcavablar Klubunun prezidenti, "Bakılı oğlanlar" komandasının kapitanı olub. Siyasi mövqeyi bitərəf idi.

Birinci, ikinci və üçüncü çağırış Azərbaycan Respublikası Milli Məclisinin deputatı olub. Sonuncu dəfə 2005-ci il noyabrın 6-da 30 saylı Suraxanı birinci seçki dairəsindən deputat seçilmişdi.

Anar Məmmədxanov ölümündən xeyli əvvəl "Ultra Production" şirkətini yaratmışdı. Onun məqsədi tarixi mövzuda bədii-sənədli filmlərin çəkilişləri ilə məşğul olmaq idi. Keçmiş deputat bildirmişdi ki, "Ultra Production" artıq 2 film layihəsini hazırlayıb. Bunlardan biri Azərbaycanda iudaizmin tarixinə, digəri isə Bakının qədim məhəlləsi olan "Kubinka" ilə bağlı olmalyıdı.

Sonuncu - 2010-cu ilin 7 noyabr seçkilərinə qatılmamağı barədə danışarkən A.Məmmədxanov bildirmişdi ki, 3 dəfə deputat olub və bu kifayətdir. "Namizədliyimi irəli sürmədim. 15 il deputat oldum. Mən məgər Mikoyanam ki, 20 il postda oturum? Mən ömrümün ən yaxşı illərini deputatlığa verdim. Nə qədər toylara getmək olar? Nə qədər nəhəng miqdarda xahişlərə qulaq asmaq olar? Birinə kömək edirəm, 20-nə edə bilmirəm. "Oğlumu tutublar, buraxdır" kimi xahişlər çox olurdu. Axı mən necə kömək edə bilərdim?".

Mərhum evli idi, 3 övladı - 1 oğlu, 2 qızı yadigar qalıb.

O. "Qurd qapısı" yaxınlığındakı qəbiristanlıqda dəfn edilib.



AzVision.az