"Ermənistanın təhlükəsizliyi İranın təhlükəsizliyidir" - İran səfiri

   "Ermənistanın təhlükəsizliyi İranın təhlükəsizliyidir" -    İran səfiri
  20 Yanvar 2023    Oxunub:1214
Ermənistanın müstəqilliyinə və ərazi bütövlüyünə hörmət edilməlidir. AzVision.az xəbər verir ki, bunu İranın Ermənistandakı səfiri Abbas Bədəxşan Zohuri Zəngəzur bölgəsinə səfəri zamanı jurnalistlərə açıqlamasında deyib.
Zəngəzurda İrəvanın müstəqilliyi və ərazi bütövlüyü məsələsinə hansı səbəbdən toxunduğunu qeyd etməyən səfir ölkəsinin bütün qonşularına qarşı bütün sahələrdə əməkdaşlığın inkişafına yönəlmiş siyasət yürütdüyünü iddia edib.

"Ermənistana ixracı 1 milyard dollara çatdıracağıq" - İran səfiri
"Ermənistan bizim dost qonşumuzdur və ona qarşı da eyni siyasət aparılır. Xarici işlər nazirinin də qeyd etdiyi kimi, Ermənistanın təhlükəsizliyi İranın təhlükəsizliyidir", - Zohuri qeyd edib.

Onun sözlərinə görə, Tehranın mövqeyi həmişə ondan ibarət olub ki, region ölkələrinin, o cümlədən Ermənistanın müstəqilliyi və ərazi bütövlüyünə hörmət edilməlidir.

Erməni xalqını az qala öz xalqı sayan səfir onu da xüsusi olaraq qeyd edib ki, İrəvanla Tehran arasında münasibətlər bütün istiqamətlərdə inkişaf edir. O, belə inkişafın bundan sonra da davam edəcəyinə ümid etdiyini bildirib.

Qeyd edək ki, İran səfiri bu gün Ermənistanın ərazi idarəetmə və infrastruktur naziri Qnel Sanosyanın müşayiəti ilə Zəngəzurə dedib. O, son zamanlar Zəngəzur bölgəsinə tez-tez səfərlər edərək sərhədlərin dəyişdirilməməsi, müstəqillikdən danışır.
Tural Tağıyev
AzVision.az



Teqlər:   Ermənistan   Səfir   İran  





Xəbər lenti