Tələbə Qəbulu üzrə Dövlət Komissiyasından AzVision.az-a verilən məlumata görə, imtahan saat 14.00-da Azərbaycan Tibb Universitetinin V korpusunda başlanacaq və 1 saat 30 dəqiqə ərzində aparılacaq.

Köçürülmə ilə əlaqədar keçiriləcək imtahanda iştirak etmək üçün TQDK tərəfindən bu il sentyabrın 3-dən 5-dək tələbələrin qeydiyyatı aparılıb və 36 tələbə müraciət edib.
Tələbələr imtahana gələrkən aşağıdakı sənədləri özləri ilə gətirməlidirlər: şəxsiyyəti təsdiq edən sənədin əsli; “Tələbənin imtahana buraxılış vərəqəsi” (buraxılış vərəqəsi tələbələrə TQDK-dan təqdim olunur).

İmtahan aşağıda təqdim olunmuş fənlər üzrə aparılacaq: I kurs tələbələri - normal anatomiya (I və II semestrin materialları əsasında), tibbi biologiya və genetika, ümumi və bioüzvi kimya; II kurs tələbələri - normal anatomiya, normal fiziologiya, biokimya;
III, IV, V kurs tələbələri - patoloji anatomiya və patoloji fiziologiya, mikrobiologiya, biokimya.

İmtahanda hər fənn üzrə 20 sual olmaqla ümumilikdə 60 test tapşırığı təqdim olunur. Suallar Azərbaycan Tibb Universitetinin tədris proqramları əsasında hazırlanıb.
Test imtahanında hər düzgün cavab bir balla qiymətləndirilir. Səhv cavablar tələbənin imtahan nəticəsinə (yekun balına) təsir göstərmir.

Hər bir fənn üzrə topladığı balı 6-dan, ümumi balı isə 30-dan az olmayan tələbələrin biliyi məqbulla qiymətləndirilir.