Müsavat Partiyasının VIII qurultayı öz işinə başlayıb. Qurultay Əmircan qəsəbəsindəki Səttar Bəhlulzadə adına mədəniyyət evində keçirilir.

AzVision.az-ın qurultayda iştirak edən əməkdaşının bildirdiyinə görə, başqan seçimlərinin təxminən saat 13:00-da başlaması planlaşdırılır. Nəzərdə tutulub ki, səsvermədən sonra saat 17:00-da səslərin nəticələri elan ediləcək.

***

İsa Qəmbər çıxışında müxalifət təmsilçilərinin qurultaya çağırılmamasına aydınlıq gətirib. Bildirib ki, Müsavat qurultaya heç kimi dəvət etməyib.

`Qurultaya heç kimi dəvət etməmişik. Müsavat partiyası xalqın üzünə açıqdı. Dostlardan kim gəlib iştirak etmək istəyirdisə buyub gələ bilərlər.`

İsa Qəmbər daha sonra yarızarafat qurultay iştirakçılarının diqqətinə çatdırıb ki, BMT-nin baş katibi Pan Gi Mun və ABŞ prezidenti Barak Obama onları qurultay münasibəti ilə təbrik etməyib.

***
Başqanın hesabatı, təşkilati işlər, seçkili orqanlara nümayəndələrin qeydə alınması gündəlikdə qəbul edilib.

Reqlament belə nəzərdə tutulub ki, ilk 1 saat başqan və qonaqlar çıxış etsin. Sonra 15 dəqiqə fasilədən sonra MNTK hesabatı olacaq. Bundan sonra cari məsələlərə baxılacaq. Başqan və MNTK seçkilərinin nəticələri bu gün qurultayda açıqlanacaq.

Fatimə Kərimli