Bakıda tıxac probleminə yeni çarə
AMEA-nın İqtisadiyyat İnstitutunun xidmət sahələrinin inkişaf problemləri şöbəsinin müdiri, mühəndis-iqtisadçı Aqil Əsədov paytaxtın şimal qapısında müasir yol şəbəkəsinin yaradılması istiqamətində görülən işləri təqdir edir. Bununla yanaşı, A.Əsədov həmin ərazidə avtomobil sıxlığının azaldılması üçün əlavə tədbirlərə də ehtiyac olduğunu bildirir.
Bu barədə fikirlərini AzərTAc-ın müxbiri ilə bölüşən mühəndis-iqtisadçı deyib ki, avtovağzal ərazisində “Bakı dairəvi-1” yoluna birbaşa çıxışın təmin olunması problemin həllinə əhəmiyyətli dərəcədə təsir göstərəcək. Lakin müşahidələr göstərir ki, şəhərə daxil olan nəqliyyat vasitələri əsasən “20 Yanvar” dairəsindən Ziya Bünyadov prospekti istiqamətində hərəkət edir və bu yolda tez-tez sıxlıq yaranır. Odur ki, Beynəlxalq Avtovağzala yaxın ərazidən, eyni zamanda, Biləcəri-Ziya Bünyadov prospekti istiqamətində də birbaşa çıxışın olması vacibdir. Bu, şəhərə girişi xeyli asanlaşdıra bilər.