AzVision.az-ın məlumatına görə, Türkiyə XİN Lavrovun səfərinin gündəmdə olmadığını açıqlayıb. Bildirilib ki, iddialar reallığı əks etdirmir.

Qeyd edək ki, Türkiyənin `Aydınlık` qəzeti Sergey Lavrovun yaxın vaxtlarda Türkiyəyə səfər edəcəyini yazıb.

Xatırladaq ki, Rusiyaya məxsus qırıcı təyyarə ötən ilin noyabrın 24-də Türkiyənin Suriya ilə sərhədindəki Hatay vilayətində vurulub. Hərbi təyyarə Türkmən dağı ərazisindəki Qızıldağ istiqamətində yerə düşüb. Pilotlar katapulta etsələr də, onlardan biri ölüb. Digər pilotlar isə xüsusi təyinatlıların keçirdiyi 12 saatlıq əməliyyat nəticəsində xilas edilib. Bundan sonra Rusiya və Türkiyə arasında münasibətlər kəskinləşib. Hətta Rusiya birtərəfli qaydada Türkiyəyə qarşı iqtisadi sanksiyalar tətbiq edib.

Bu insidentdən sonra Türkiyə lideri Rəcəb Tayyib Ərdoğan Putinlə dəfələrlə görüşməyə dair təşəbbüs göstərsə də, Rusiya lideri hər dəfə bundan imtina edib.

Eldar Tanrıverdiyev
AzVision.az