“Açıq İnnovasiyalar üzrə Startap Turu” keçiriləcək
Tədbirdə Rusiyadan “Skolkovo” texnoparkının nümayəndələri, startaplar, biznes qurumlarının təmsilçiləri iştirak edəcək. Startap tur çərçivəsində qlobal tendensiyalar və beynəlxalq təcrübələr haqqında maarifləndirmə sessiyaları, sahibkarların şəxsi və peşəkar keyfiyyətlərinin inkişafı üçün treninqlər və yerli startaplar üçün müsabiqə keçiriləcəkdir. Müsabiqədə iştirak edəcək layihələr üçün biotibb, informasiya texnologiyaları və sənaye istiqamətləri əsas hesab edilir. Həmçinin, xarici layihələrin Azərbaycan bazarına tanıtımını təmin etmək məqsədilə tədbir çərçivəsində “Demo Günlər”in keçirilməsi planlaşdırılır.
Tədbir startapçılar, biznes nümayəndələri üçün əlaqələrin yaradılması, təcrübə mübadiləsi üçün əlverişli platformadır.
Tədbirdə iştirak üçün aprelin 10-dək https://startup-tour.ru/register/ru ünvanında qeydiyyatdan keçilməlidir. Müsabiqədə iştirak etmək istəyən startapçılar https://startup-tour.ru/ru/page/competition ünvanında qeydiyyatdan keçərək "Mən müsabiqədə iştirak etmək istəyirəm" seçimini edib, ərizə formasını dolduraraq şəxsi kabinet bölməsində layihə təqdimatlarını yükləməlidirlər.
Müsabiqədə 1-ci yeri tutan qalib mükafatla yanaşı “Skolkovo” Texnoparkında təşkil olunacaq texnoloji sahibkarlar üçün “Startup Village” startap-konfransında iştirak hüququ əldə edəcək, 2 və 3-cü yerləri tutan qaliblər isə digər mükafatlara layiq görüləcəklər.
Qeydiyyat üçün son gün – 10 aprel 2017-ci ildir.
Tədbir roud-şou formatında Bakı Biznes Mərkəzində (Neftçilər prospekti, 44) keçiriləcəkdir.
Tədbirin təşkilatçıları Azərbaycan Respublikası Nəqliyyat, Rabitə və Yüksək Texnologiyalar Nazirliyi, Rusiyanın "Skolkovo" Texnoparkı, Vəsaitlərin İnkişafı Dövlət Fondu (RVK), Rusiya və Şərqi Avropada nəhəng startap akseleratoru olan “GenerationS” layihəsi, İnnovasiyaların Təşviqetmə Fondu (Фонд содействия инновациям) və Rusiyada yüksək texnologiyalar, nanotexnologiya sənayesi üzrə layihələrin inkişafı sahəsində dövlət siyasətini həyata keçirən “RosNano” ASC-dir.
Partnyorlar və sponsor qismində “Tatneft”, “SAP”, “AlRosa”, “Kaspersky lab”, “Intel”, “Astrazeneca” şirkətləri çıxış edir.
Tədbirlə bağlı məlumatlar mütəmadi olaraq https://startup-tour.ru saytında yerləşdiriləcək.
AzVision.az
Teqlər: Startup