“Buta Airways” uçuş terminalını dəyişir

“Buta Airways” uçuş terminalını dəyişir
  26 Oktyabr 2017    Oxunub:2688
“Buta Airways” loukoster aviaşirkəti oktyabrın 29-dan etibarən Bakıdan bütün uçuşlarını Heydər Əliyev Beynəlxalq Aeroportunun “Terminal 2”nin Şimal girişi vasitəsilə yerinə yetirilməyə başlayacaq.
Heydər Əliyev Beynəlxalq Aeroportunun mətbuat xidmətindən AzVision.az-a bildirilib ki, loukoster gələn reysləri isə əvvəlki kimi “Terminal 1”də yerinə yetirməyi planlaşdırır.

“Terminal 2” mülki hava limanlarının istismarı üzrə bütün beynəlxalq tələblərə cavab verir. Terminalda kafe və restoranlar, “Duty Free” rüsumsuz ticarət mağazaları fəaliyyət göstərir. Hava limanının bütün ərazisində pulsuz yüksəksürətli internet (Baku Airport Free Wi-Fi) təklif olunur.

Həmçinin uçuş terminalının dəyişməsi ilə əlaqədar olaraq, BakuBus H1 Airport Express avtobusunun marşrutu da dəyişəcək. “Terminal 2”nin uçuş zonasının qarşısında əlavə dayanacaq olacaq. Avtobus hər yarım saatdan bir Heydər Əliyev Beynəlxalq Aeroportu və Bakının mərkəzi ("28 May" metro stansiyası) arasında "Koroğlu" metro stansiyasının yaxınlığında qısamüddətli dayanmaqla hərəkət edir.

Əlavə məlumat üçün terminallardakı məlumat köşklərindəki əməkdaşlara, (+994 12) 497 27 27 telefon nömrəsi vasitəsilə aeroportun 24 saat fəaliyyət göstərən Çağrı mərkəzinə, həmçinin “Facebook” sosial şəbəkəsində “www.fb.com/BakuAirport” rəsmi səhifəsinə müraciət etmək olar.

AzVision.az


Teqlər: Buta-Airways  





Xəbər lenti